爭出鏡
跛 Co翻生無望 黃宗澤爭輸變大茄
2011年11月02日
食住電視劇《潛行狙擊》氣勢，邵氏開拍電影《Laughing Gor 之潛罪犯》，上星期正式埋位。
電影開拍前，外界一直盛傳「跛Co」黃宗澤將會孭重飛做第一男主角，可惜劇本最後決定跛Co只會在Paris（徐子珊飾）的回憶中出現。換言之 《潛》劇同Laughing鬥到死嘅跛Co黃宗澤，冇機會復活，戲分等如大茄。而喺《潛》劇被法拉食住嘅徐子珊，電影版就孭重飛，同謝天華、吳鎮宇有唔少戲分，終於贏法拉一次。
《潛行狙擊》結局收視最高40點，劇中飾演「跛Co」嘅黃宗澤（Bosco），雖然於劇中死去，但一直有傳開拍嘅電影版中跛Co有機復活。
鬼叫你死咗咩？（設計對白）
9月9日，《潛》劇全體演員齊集睇結局，其間黃宗澤仲攬住謝天華作狀咀扮老友。謝天華今次爭贏黃宗澤，加埋上映日期接近12月尾，宣傳期食正12月頭頒獎禮，Laughing Gor都有機攞視帝㗎！
跛Co精神分裂
據知編劇原先諗住將跛Co以精神分裂為由，夾硬將劇集版的跛Co「死去活來」，可惜最後都度唔掂，惟有將跛Co變成在徐子珊飾演的大律師 Paris回憶中出現，Bosco慘變大茄。 上週六（29日）《Laughing Gor 之潛罪犯》舉行開鏡拜神記者會，變為大茄的黃宗澤，因身在馬來西亞宣傳而缺席，人冇到，連海報位置亦降呢，排在杜汶澤之後。 其實《潛》劇收得，黃宗澤飾演嘅跛Co功不可沒，有幾集更搶鏡過主角謝天華。不過謝天華最終成贏家，當日開鏡更風騷過人。其間有派五蚊環節，天華更堅持派晒畀在場每個記者，仲話：「等我派晒先做訪問。」
《潛行狙擊》收得，主要靠Laughing同跛Co鬥法先吸引到觀眾，家跛Co變大茄，吸引力似乎差少少。
黄宗澤戲中做大茄，所以電影海報嘅位置亦靠到最邊，排喺杜汶澤之後。
為錢留低
盛傳因為片酬高先肯留低嘅吳鎮宇喺《潛罪犯》做大奸角。不過當日記者會上，鎮宇連造型都未搞，仲要返大陸拍埋套《灜寰之志》先埋得位開工。
新 吳鎮宇 飾演因販毒被囚的大學教授，幫Laughing Gor逃獄，而且亦係警方派入監獄的卧底。
子珊最多戲
男主角Laughing獨大，女主角雖然冇咗陳法拉，不過就仍然有徐子珊，再新加入Janice Man，甚至零演出經驗的應屆港姐冠軍朱晨麗。雖然有報道指由首次拍電影嘅朱晨麗擔正，但實情戲分不及徐子珊及Janice Man，徐子珊更係第一女主角，跟謝天華及吳鎮宇有大量對手戲。 戲分唔多，但朱晨麗都好謙虛，更話冇諗過自己有份，「我冇諗過有份㗎，到最後今日先知，所以都好意外。」橫掂無綫鬧花旦荒，益吓靚港姐又何樂而不為？
新 杜汶澤 Laughing喺獄中認識嘅朋友，角色類似《無間道》嘅儍強。
舊 MC Jin 繼續飾演楊立青一角，做Laughing Gor條。
黄宗澤電影記招冇影，原來去咗馬來西亞宣傳，不過連日來就冇喺微博更新，唔知係咪嬲咗呢？
《潛罪犯》講乜？
故事延續《潛行狙擊》結局，Laughing Gor入獄之後，喺獄中認識高智商犯罪心理學家嘅吳鎮宇，之後吳鎮宇更會幫Laughing Gor逃獄。 Laughing Gor發現原來吳鎮宇亦係警方派來嘅臥底，目的係在獄中與精神錯亂嘅前毒品調查科警長口中得知黑警名單。但最後發現一切原來都係吳鎮宇一手策劃。
JM搶鏡
Janice Man喺戲中飾演女警，角色有點似《潛》劇入面嘅陳法拉madam Jo。開鏡當日Janice Man更扣少兩粒鈕露黑bra搶鏡，不過徐子珊亦嚟招「先禮後兵」攬實JM扮老友。
正忙於拍《東西宮略》的法拉雖然冇份拍《潛罪犯》，但出年佢仲有《名媛望族》及《衝上雲霄2》一共3劇在手，懶理徐子珊做女主角。
有傳備受力捧嘅港姐冠軍朱晨麗，戲份原來得一場。最重戲、最難演嘅戲份全部交由徐子珊演出。
一雞兩味
一向以拍劇為主的TVB，近年都愛把受歡迎電視劇改拍電影版，並由「邵氏」出品。如《學警狙擊》就將劇中謝天華飾演的Laughing哥角色，拍成電影《Laughing Gor之變節》；就算最受歡迎的綜藝節目《荃家福祿壽》都唔放過，拍成電影版《勁抽福祿壽》。有賺錢機會TVB當然用到盡。
Laughing哥掂
09年《學警狙擊》最高收視高達43點，而謝天華更憑劇中臥底角色Laughing哥走紅。之後TVB食住上拍成電影《Laughing Gor之變節》，套戲前年8月上畫，埋單大收1,560萬。
福祿壽仆
上年由王祖藍、阮兆祥、李思捷搭阿姐汪明荃炮製的《荃家福祿壽》，靠扮鬼扮馬引到觀眾笑死，最高收視曾攀升到33點，是近年綜合節目收視之冠。今年雖食住個勢拍成電影《勁抽福祿壽》，該劇今年8月暑假檔期上畫，但只收620萬票房，唔多收得。
Orignal From: face 232 laughing
沒有留言:
發佈留言