新節目《皆大歡喜之溏心風暴》《瘋狂電視台》新版《歡樂今宵》

家燕、祥仔炮製美食版皆大歡喜

余詠珊回歸無綫之後瞓身大搞綜藝節目，除咗今年會玩即時死亡制嘅港姐選舉，同下月7號嘅紅白歌唱大賽之外，嚟緊仲會推出幾個節目，包括薛家燕同阮兆祥主持嘅飲食節目《皆大歡喜之溏心風暴》，以及詹瑞文、森美同小儀主持嘅《瘋狂電視台》，至於融合娛樂同資訊嘅新版《歡樂今宵》就會喺10月推出。


早年喺《皆大歡喜》合作過嘅薛家燕同阮兆祥，將會拍檔主持飲食遊戲節目。


森美同小儀今個暑假會向觀眾放笑彈。資料圖片


詹瑞文會幫無綫主持《瘋狂電視台》。資料圖片

森美小儀扮嘢騷

一聽到《皆大歡喜之溏心風暴》，仲以為係無綫 crossover嘅新劇，特別係搵家燕姐同祥仔兩位當年《皆大歡喜》主角嚟主持，但噚日余詠珊話，呢個其實係15集嘅煮餸 game show：「我問准咗珍姐（曾勵珍）可以用呢兩套劇嘅名，個 game show真係煮鮑參翅肚，家燕姐同祥仔每集會搵唔同嘉賓代表佢哋兩邊煮餸比賽。我哋會搵啲真係識煮餸嘅嘉賓，觀眾睇佢哋比賽之餘仲會學到點樣煮。而最後家燕姐同祥仔之中勝出嘅一邊會有鮑魚等等嘅豐富獎品。」

至於15集嘅《瘋狂電視台》就預計喺暑假出街，余詠珊話到時除咗扮嘢高手詹瑞文同森美、小儀之外，仲會邀請全台藝員上節目，一於玩盡電影同電視，同觀眾開開心心放暑假。

---

Orignal From: 新節目《皆大歡喜之溏心風暴》《瘋狂電視台》新版《歡樂今宵》