2012年6月19日星期二

今日的我打倒昨日的我楊明

FACE週刊第265期

面對面

今日的我打倒昨日的我　楊明

2012年06月20日

訪問這天，正值傍晚，楊明在長洲拍了整天外景，收工搭船轉 TVB廠車趕到影樓。
事前，他早警告過我，新劇《情越海岸線》的離島郵差造型超薯，看到真人我還是嚇一跳：齊陰煲蓋頭襯水上人膚色、一臉倦容曬到出斑再配一套黑色雜牌 t-shirt短褲，真正薯到冇朋友、既讓人聯想不到《心戰》裏那個西裝筆挺的高級督察、更想像不到這個楊明，正是五年前醉酒刑毀衰完一鑊又一鑊的那個楊明。

換着第二個，是日 outlook被人笑完又笑，應該早就變臉，楊明沒有。因為電視台沒有別人像他一樣，接連三年套套劇清一色二世祖敗家仔，無論古裝民初定現代，無論在哪個監製眼中都一概是二世祖，敗家仔……終於有一天被從良，說明楊明真的再把人心贏回來了。
被高層珍姐曾勵珍睇起、被金牌監製器重、劇集一部接一部，《衝吧，瘦薪兵團》和《心戰》都有佢份。正值無綫鬧小生荒，人人都告訴楊明，收復失地的機會來了， 31歲的楊明卻說：「我從來冇諗過當年冇出事， o依家會去到幾高、我亦都冇諗過要攞番晒以前失去嘅，我淨係想做一個好啲嘅藝人、賺多啲錢，因為過咗今年，我嘅身份唔只係人哋個仔、仲將會係人哋老公……」
今年八月，楊明將會與拍拖三年的圈外女友結婚。我相信，沒有昨天，哪有今天。沒有壞過，哪有今天這個腳踏實地值得托負終身的 better man。

再見仆街仔

楊明是 1998年第十三屆藝訓班學員，同屆同學有楊怡和林峯等。出道 14年，我第一次跟他打交道，對他在短訊約訪過程中有禮又謙卑的態度尤其深刻。一見面，我問楊明， 14年前一畢業就被力捧、機會不停關注不斷時，工作以及與傳媒打交道的態度也是一樣好嗎？

以前唔知係唔係機會太容易得到呢？份人唔積極又冇責任心。遲到？我從來唔會，一係就索性請假唔返。
以前，夜晚掛住玩，朝早唔夠瞓就覺得周身唔聚財，真係冇諗過你一個唔返，成組戲唔使開工，大把人撲到返公司浪費咗一日。今時今日再遇到有人似我當年咁，我實鬧：「你個仆街！請假？」機會，我曾經有過、錯失過，再得到時，當然變得特別珍惜。
07年以後，我都好後悔，唔明自己點解會咁做。我想改，但並唔代表人哋相信我真係會變，連續三年，我一係冇工開、一有工開就一定係做二世祖、敗家仔，無論古裝民初定現代，一係唔搵我，搵我就一定係做啲仆街仔……次次收到劇本都係呢啲角色，做咗三年都係咁，仲要不斷聽到閒言閒語，冇人信我會改過……我真係見唔到前路，好想放棄、想轉行。
09年，我賣過女裝、大閘蟹，上廣州搞過補習社，最後仲去見工想做 sales，人哋話：「咪玩啦，點請得起你呀？」佢口係咁講，咪又係信唔過我，唔想請我囉。
就喺我最心灰意冷嘅時候，珍姐（曾勵珍）搵我去做《天天天晴》……
好多同事話，你生性啦，攞番自己失去嘅嘢啦……我唔會咁諗，我唔會計自己如果冇做錯， o依家可以行到幾遠，更加唔會再諗我以前有啲乜……我淨係會諗點樣做好啲、點樣令到再畀機會我嘅人唔好失望。

被戚其義器重，楊明在《心戰》的警探角色由頭帶到尾，亦成為討論區熱話。

投閒置散足足三年，直到 11年的《誰家灶頭無煙火》，楊明憑着田凱一角獲得「最佳男配角」及「飛躍男藝人」兩項提名。

懷裏的媽媽

楊明原名林明樂，家住紅磡。父親是五金技工、母親是製衣工廠女工、姐姐是護士。
由《天天天晴》重新起步，到去年再被珍姐重用飾演《誰家灶頭無煙火》裏的田凱一角，人氣升溫又被提名台慶飛躍獎，其實在拍《誰家》時，楊明母親一度病重。

05年起，楊明前後兩次涉及醉酒鬧事又在便利店刑毀， 07年被判守行為一年。《蘋果日報》圖片

98年訓練班一畢業，即被委派在《娛樂插班生》中飾演霆鋒，出事前，楊明一直被無綫力捧，機會唾手可得。

低潮時酒肉朋友紛紛離開，楊明說惟獨同屆訓練班畢業的楊怡和趙永洪，多年來友情不變。

我係屋企最細嗰個，乜都唔識做、乜都唔使做，有嘢，媽咪同家姐都幫我做晒。
爸爸細個會打我教訓我，喺我晚晚出去飲酒玩到出事嘅時候，已經嬲到唔識出聲。媽咪同家姐，雖然擔心，仲係繼續撐我、出錢畀我做生意。舊年 5月，媽咪喺工廠俾塊木板打到頭，雖然冇乜事，老闆都堅持要佢去醫院照清楚。
一照，就發現腦入邊有個瘤。因為發現得早、醫生又話風險唔高，做手術嗰日，一家人都仲係有講有笑，點知做完被人推出嚟，本來冇病冇痛冇徵兆嘅媽咪剃咗半邊頭髮、半塊面都係紫黑色瘀血、個人又唔醒，醒咗都會幾個鐘頭全身抽一次筋……連醫生都話冇預到手術後反應咁嚴重。我明明好驚，人生第一次見到最親嘅人變成咁，唔敢對住媽咪喊又唔可以唔返工，套劇仲要係每日都要開廠嘅輕鬆喜劇……
我最記得有一次，明明已經出咗院，媽咪行得走得好似好好，有一晚我出門口開工，媽咪叫我食埋飯先。
媽咪就係咁，明明話唔得閒食，佢都照夾餸落隻碗到叫我食啲先，我開咗道門想走，聽到「篤篤聲」，擰轉頭見到媽咪不由自主咁右手揸住雙筷子係咁篤個碗……佢次次抽筋都係由隻手先，我嗱嗱聲抱住佢叫佢放鬆，但係就睇住佢由有意識變得冇意識。我考過救生員牌、識得急救，但係嗰一刻攬住媽咪，乜都唔識做、連 999都唔記得要打，原來當你最親嘅人、由細到大依賴慣嘅人，冇力咁瞓喺自己懷抱裏邊，我嘅反應會係咁。

由嗰日開始，我成日同我講，唔好再覺得老馮，我擁有嘅嘢隨時會失去，我最想唔再係媽咪為我做啲乜，我好想為媽咪爹哋做啲嘢，唔使佢哋兩個再捱。

卡半的真心

與陳敏之拍過拖、又和佘詩曼傳過緋聞，還曾經無數次被拍到夜蒲拖攬妙齡女生。
情場鬼見仇楊明，去年十月突然在微博公布即將迎娶拍拖三年的圈外女友 Joanna。
楊明說求婚用的卡半鑽戒，就用了他將近全副身家。

舊年 10月我哋一齊去台北旅行，我一早諗住喺嗰邊求婚㗎喇，結果有日行街行到去西門町，坐低喺路邊唞唞吓，咪攞隻戒指出嚟跪低囉……真係有路人拍手歡呼㗎。
其實我特登揀外地，去到啲冇乜人識嘅地方，個人可以豁出去啲、去得盡啲吖嘛。
我多咗劇拍冇時間搞，香港酒席又實在太難 book，索性 8月去紐約結婚，請咗女朋友屋企人飲咗先。
我喺呢行咁耐，靚女當然好多，但見高拜、見低踩嘅亦都見唔少，所以我特別感激低潮時都仲理我、唔會扮唔識嘅一班朋友，好似楊怡、趙永洪，仲有呢個女朋友。
我覺得相由心生係真㗎，以前我份人貪玩又是鬼但，個樣咪生得是鬼但咁樣囉， o依家可能個樣真係值得佢付托終身，所以佢咁好嘅女仔都肯交托終身畀我囉。

楊明與陳敏之曾經公開戀情， 03年陳敏之父親去世，楊明一直陪伴左右。《蘋果日報》圖片

去年 10月，楊明宣布求婚成功，將與女友在今年 8月赴美完婚。

Better Man

說起訂婚戒指，楊明有點兒肉赤但笑得開懷，婚後居住安排，他說移民美國並在當地工作的未來老婆將回流香港，父母在紅磡的舊居亦正在裝修中，到時候兩輩夫妻各佔一間房同住，然後自己再努力工作，盡早養起父母和嬌妻。
距離豪和風光還差得遠，與每個小市民一樣捉襟見肘，但是真心覺得眼前的這個楊明，與資料相裏那個人，完全是兩個人了。