由港姐變名模踏上天橋，卻因身高及外形跟台灣第一名模林志玲相似，林莉多年來背負着「港版林志玲」的外號。凡事有辣有唔辣，這個外號時刻都提示大家把林莉與林志玲比較，但林莉從沒想過，也不敢妄想超越對方的成就。
日漸成長不跳步
她說：「我好隨遇而安，可以話冇乜計劃，煮到埋嚟就食。可能我諗嘢太正面，只係一心做好自己就算，就算大家要攞嚟比較都冇所謂。每人條路都唔同，我清楚自己做緊乜，向自己同公司交代就夠。不過，成日畀人咁叫，有時都覺得唔好意思，我係我，我未有林志玲咁犀利。」
林志玲行天橋行出「錢」途，逐步蜚聲國際，雖然林莉這個翻版跟正版的「錢」途還有距離，笑言只是「一舊雞」的她，對現狀很是滿足：「呢幾年出咗兩本寫真，喺韓國攞獎，有機會去唔同地方行唔同類型嘅騷，我搵唔到理由點解仲要話唔幸褔、唔滿足。好似行內衣騷咁，個個都嘩一聲，但係我可能長大咗，覺得都係工作一部分，冇咩唔妥。」
有人的地方就有是非，在競爭激烈的模界亦然，林莉坦言可能在經理人及家人的保護下，猶如溫室小花，故從不知道外間的風雨是非：「簡單講句，我係畀人搵笨都唔會知！我好慢熱，唔係好識睇人，所以有冇人玩我，或唔喜歡我，對方唔講出口我都唔會知！其實有好有唔好，好嘅係覺得個世界好似好和平，但可能得罪咗人或自己有缺點都唔知。所以，如果有人唔妥我，唔好喺背後講，直接同我講啦！哈！」
堅守原則拒應酬
人際脈絡令前途事半功倍，尤其模特兒主動點，機會自然多點。觀乎過往蘭桂坊名人夜蒲實錄中，林莉可算榜上無名，她說：「我都幾宅女，唔使開工就匿喺屋企，放工做番自己。我唔覺得唔去應酬會蝕底，模特兒係一種個人表現，客戶係咪欣賞係好主觀，我只會工作時同客戶打招呼傾吓偈，最多拍完嘢食吓飯。我唔覺自己唔識做o架，同埋經理人都幫我擋晒啦！叫我去應酬，真係唔知做咩好。我驚我會悶死對方，哈哈！」
後記：傻氣無改
始終如一，林莉多年來都保持着「一舊雞」傻氣十足的本色，說到興起時，會施展「貓爪功」肉緊地抓着你的手臂，又或者突然自行轉Channel，眼泛淚光的跟你說電影《我和尋回犬的10個約定》如何感人好看。浸淫圈中多年仍能保持赤子之心，模界玉女當之無愧。
正所謂「人有相似，物有相同」，雖說造物者創造每個人都是獨一無二，不過在毫無血緣關係下，也有「撞樣」情況。以演藝圈為例，應屆港姐冠軍朱晨麗（Rebecca）參選時被指是「國產周麗淇」，當選後成為「翻版陳法拉」，她笑言能跟以上靚女相提並論，實是榮幸：「大家嘅共通點應該係大眼同清秀，既然大家覺得我同呢啲靚女相似，我都會覺得自己係靚女o架喎！咁不妨畀人嗌吓綽號啦，哈哈！」
自信能成典範
不過，要成為某人的翻版，也要那位某人具知名度，Rebecca深明此理，所以期盼「翻版朱晨麗」的出現：「我希望遲啲觀眾會多啲記得我，可能再下一屆嘅港姐會有『翻版朱晨麗』呢！始終你有呢個代表性同特點，先會有人講邊個邊個似你，咁都幾開心！」
Rebecca當選港姐幾個月後，已有機會參演電影和電視劇的重要角色，但外間大多認為是源於她貌似陳法拉，像劇集《名媛望族》，法拉因健康理由辭演她才能頂上，不過她並不介懷：「觀眾未必記得我真名，但『翻版陳法拉』呢個名會令人快啲認識我，呢個方式入屋都幾好！」她亦懂得把「翻版」話題當宣傳：「有人問監製點解揀我，其實係佢哋覺得我感覺啱啲，又畀人話似法拉，外間就會講呢個女仔演陳法拉個角色，都幾大宣傳效用o架！」
壓力推動進步
演藝之路走得愈快，有機會跌得更快。毫無演戲經驗的Rebecca擔正《名》劇，稍有差池隨時被插爆「唔識做戲」，壓力並非人人能夠承受，但一想到機會難求，她就誓要把「機會與壓力」平衡，發揮最高效能：「壓力好定唔好，睇你識唔識揀，如果揀咗唔好嘅方向，咁就好難投入角色。既然壓力同機會點都要並存，不如將壓力化為動力推動自己咪仲快？我畀咗好多時間去溫習演戲嘅嘢，因為冇人廿四小時不斷教你，你要自己去摸索！」
後記：樂傳緋聞
朱晨麗上位快，不過緋聞傳得更快，拍攝《名》劇時與拍檔馬國明與吳卓羲傳緋聞，但她坦言不會避忌，更打趣說：「我係新人，都唔知可以驚啲乜！我哋都知邊啲係真、邊啲係假，最緊要相處和諧，就算同松哥（劉松仁）傳緋聞我都開心！」
林莉不願走捷徑上位，安於在公司和家人的庇蔭下緩步前進。
朱晨麗寄望自己的翻版出現，證明自己也擁有獨一無二的特色。
當選港姐冠軍後，朱晨麗（中）的工作機會接踵而來。
馬國明（右）
Orignal From: 林莉推翻 朱晨麗延續
沒有留言:
發佈留言