2012年6月29日星期五

喬寶寶別了香港家

忽然1周第883期

星悅居

喬寶寶　別了香港家

2012年06月29日

參加《殘酷一叮》入行的喬寶寶，憑藉誇張、騎呢，在無綫殺出血路。 35歲才當藝人，這條路看似很難行。
難行，也要養家。家有嬌妻兩個兒子的喬寶寶，多年來除了不接色情片之外，其餘乜都做，令他成為 3間餐廳及製作公司的老闆，家人可以安樂無憂。
去年他毅然賣掉香港物業，轉移所有資產俾老婆及兩子到蘇格蘭定居，現時他孤伶伶在佐敦道租住六百呎屋，並打算退出幕前，短期內會搬埋過去敍天倫，攞戶籍做個真正英國人。面對如此斗室，雖然沒有豪裝和貴價家具，不過對於喬寶寶來說，這個在港的最後一個家，肯定一世懷念。

幾乎每個印度人都喜歡在家煮「自家招牌咖喱」，喬寶寶亦不例外，廚房除了有各式各樣的咖喱香料外，最多竟然是雞蛋，「平時夜收工，煎蛋煮麵最方便。」

喬寶寶在電視劇《衝呀！瘦薪兵團》升呢做男主角陳展鵬好友，算是幕前較多戲份的一次，但如無意外，這亦是他最後一次在香港電視劇的演出。

印度人在香港，不少都受到白眼。喬寶寶紮根在香港 42年，話冇受過歧視就嘥氣。當了 16年懲教署二級懲教助理，因為他是南亞裔，所以毫無晉升機會，「愈做愈灰，好似原地踏步一樣，唔轉行就即係逼自己入死胡同。」寶寶說。

密做三年即置業

05年他把心一橫參加《殘酷一叮》，將胸毛剃成「 TVB」三字，既擦鞋又大膽，雖然最終還是輸了，卻得到藝員合約一份。以「襟撈」見稱的寶寶，一直密密登台、拍廣告，試過一日走七場騷，先發現錢原來咁易賺，相比做懲教署時賺每月兩萬幾，簡直蚊髀同牛髀。入行首年已經唔覺唔覺賺了第一桶金，三年後已可在香港置業，目前他更是餐廳「千福大少」兩間店及製作公司的股東，財力十足。「係要多謝黑妹姐李麗霞關照，佢毫無條件帶挈我呢個契細佬，跟住有咩就預埋我，開餐廳、開製作公司又搵我，入行咁耐啲登台都係全部靠佢。」

喬寶寶全家的「值錢嘢」都被老婆一夜之間帶走了，他笑言會攬住金飯碗擺設、銀紙夾和 TV Buddy公仔來過世。

客廳非常簡單，只靠一個大組合櫃放置電視、電腦、打印機、 DVD機、卡拉 OK等所有電器，「唔想擺咁多嘢，方便第時走佬快啲！」

喬寶寶 19歲結婚， 20歲第一次做爸爸，誕下大仔喬本龍。家庭觀念好重的他，在妻子不在家的日子，惟有靠客廳櫃內的家庭照以解相思之苦。

喬寶寶二百呎的客廳光猛整潔，面積雖小，但設備齊全。餐枱更用收納式設計，當櫈坐又可當櫃桶，相當慳位。

二百呎的客廳光猛整潔，面積雖小，但設備齊全。餐枱更用收納式設計，當櫈坐又可當櫃桶，相當慳位。

03年正值沙士期間，喬寶寶與愛妻再造人成功，誕下幼子喬寶貝（左），喬寶寶說：「嗰年生仔保證有牀位嘛！」

喬寶寶表面對長子好嚴，但內心卻十分疼這名兒子。這天喬本龍（左）放暑假返港探爸爸，寶寶多次忍唔住對記者大讚兒子。「好彩佢生性，咁耐以來都冇咩大鑊嘢俾我。」

喬寶寶最愛在廚房邊唱歌邊煮咖喱，所以廚櫃專登選用彩藍色，「 Sharp啲，人都開心啲嘛！」

單身寡佬的家，總離不開即食食物及啤酒，喬寶寶有時更會吃剩一半放番入雪櫃。「有時做嘢好攰都唔想煮，好一餐唔好一餐啫！至於啤酒一定要存貨，因為老婆唔俾喺屋企飲酒，依家佢唔住呢度，仲唔作反咩！」

喬寶寶透過友人認識黑妹李麗霞（左下），得對方帶挈登台賺快錢，而李亦有幫其他藝人如朱咪咪、黎耀祥等安排登台。

密食當三番

在新劇《衝呀！瘦薪兵團》中，喬寶寶首次升呢擔重戲份，奈何角色和戲份不斷攀升之際，他就急流勇退，打算到蘇格蘭定居。
回顧他入行的七年，不時走埠登台、拍廣告搵真銀。粗略估計，他平均月賺 80萬，是個隱形富豪。

登台：平均每月唱 5場（騷價約 3萬）約$15萬
晚宴司儀：平均每月 5場（騷價約 2萬 5）約$12.5萬
生意：兩間食肆及製作公司約 25萬
月賺共 52.5萬

移民為對仔

錢是賺到了，喬寶寶卻全部奉獻給嬌妻「喬嫂嫂」。喬家有兩個金叵羅， 20歲長子喬本龍今年在蘇格蘭讀大學三年級主修經濟，已計劃明年多讀兩年碩士課程；而 9歲幼子喬寶貝則先天患有脊椎神經問題致行動不便，需長期做物理治療，兼有過度活躍症。為了長子的教育及幼子的成長，去年他賣掉香港物業，把資產一併移至蘇格蘭。
香港只剩他孤伶伶一支公，現時喬寶寶在佐敦道寶輝閣租住一個 602呎的中層單位，面積雖小但骨子，沒多餘擺設，令本身狹窄的客廳顯得寬敞。「得一個人，咁大都冇用，反正啲嘢都搬晒過去蘇格蘭，過多一年我都會走，過去坐番幾年移民監，攞埋個英國戶籍。舊年我同個妹合資開咗間印度餐廳，生意都唔錯，到時先決定返唔返香港。住佐敦係因為情意結，由細到大都住呢區，鍾意行廟街，食蝦餃、燒賣係我至愛，呢份感情好深厚。」
這份情除了紮根 42年的人情味，還有工作 7年的 TVB。「入 TVB俾我識到好多好朋友，佢哋好重情義，同我哋啲印度人好相似。」事實上，寶寶家多處放有 TV Buddy及在無綫玩遊戲節目贏得的禮物，提醒自己做個不忘本的人。