姚子羚早前在《我的如意狼君》中演技備受讚賞，其實她亦有過難忘低潮，演技被「彈」至一文不值，Elaine痛定思痛，積極改進後演技更上層樓，她說：「06年我第一次喺劇集《鐵血保鏢》中擔任女主角，當時我經驗不足，其實咩都唔識，好擔心自己演得唔好！當時我都聽到好多批評，不過我都當係善意嘅批評，曾經有網友留言『我一見到你喊就想熄電視！』我有試過Depress，亦有一刻灰心，但都好多謝呢啲批評，因為咁我先可以知道我有咩問題，然後再去改善！如果6年後的今日我再演呢個角色嘅話，我有信心可以演得更好！」
斬斷四年情
曾視愛情大過天的Elaine，早前與拍拖四年的圈外男友分手而飽受情傷，她大嘆說：「對方唔夠專一！既然Keep住受傷就想放手，繼續拉扯落去都冇意思，年紀大咗亦都唔想再浪費時間，我依家只係想要一段穩定嘅關係！」幸好有得亦有失：「因為經歷過感情上的起起跌跌，我依家會更投入角色！」
分手後的Elaine坦言現在追求者眾：「依家有啲細過我嘅男仔追我，又有年紀大到五十幾歲嘅人追我，分手後係多咗人追！但都想睇定啲先，因為要搵如意郎君唔容易！」
現年31歲的她更笑言會採取主動：「我依家都Open Mind咗，亦比以前Aggressive，我會主動問身邊朋友有冇男仔介紹，咁佢哋又好幫得手，真係會介紹男仔畀我識，咁我又當係識多個朋友，又冇話一定要識男友或老公！」
對於遲遲未投入另一段感情，Elaine坦言顧慮多，亦怕被誤解：「我鍾情與圈外人拍拖，因為圈中人工作唔定時，大家都太忙就會好難維繫感情！但係好多圈外人又會Bias（偏見）圈中女藝人會好複雜，而且又怕對方未必接受到我工作唔定時，而且佢又可唔可以接受到我拍拖出街時被影相、被大起底？實在有太多疑問！我亦顧慮佢係咪認真，定係純粹為咗好奇同Artist拍拖！識男仔唔難，要拍拖都唔難，但要真正搵到個啱自己嘅就真係可遇不可求！」
為家人自強
經歷過情傷的Elaine笑言將與黃浩然「再續前緣」：「我喺電視劇《幸福摩天輪》中，將與浩然再次飾演情侶，但奈何我哋嘅感情會遭遇一波三折，與奸角鄭子誠更有一段糾纏不清嘅三角關係，最激烈嘅係我同子誠有一段打鬥戲，仲會畀佢毀容！」
Elaine今次在劇中飾演一位為家人而落「火坑」的舞女，她坦言現實中亦會為家人而自強：「我喺《幸》入面為咗細佬妹嘅生活，瞞住屋企人做舞女！現實中我亦好錫屋企人，以前細個時會願意為愛情而放棄事業，但依家絕對唔會咁諗，因為我都要為家人生活着想。」
後記：守時有耐性
敬業樂業的Elaine在訪問當天比原定時間早了15分鐘到場準備，當拍攝硬照時，碰巧記者的攝影器材出現問題，但Elaine卻毫無怨言及耐心等候，更Keep住擺出多個模特兒甫士，其專業精神值得一讚！
Elaine早前與拍拖四年的圈外男友分手，現在感情仍未有着落。
Elaine坦言過去為情所困，故演感情戲駕輕就熟。
姚子羚在《鐵血保鏢》擔任女主角，與馬浚偉、黎耀祥和黃智賢等合作。（資料圖片）
Elaine在《我的如意狼君》中，被黃浩然弄致身心受創。（資料圖片）
Elaine（左起）、黃浩然、羅蘭和梁烈唯，在新劇《幸福摩天輪》中合作。（資料圖片）
脫「瓶」而出
圈中不少養眼女星，初出道時都被冠以花瓶之名，但憑其堅毅不屈的性格，演技終獲肯定！
范冰冰
入行14年的內地女星范冰冰，初入行時被視為花瓶，更被狠批拍戲兩年便會收山嫁人，但前年冰冰憑《觀音山》奪「東京國際電影節」影后殊榮，演技備受肯定。
朱 茵
性感女神朱茵，其火辣外形一向比演技更備受關注，去年朱茵終憑電台單元劇《沒有牆的世界》提名國際艾美獎最佳女演員，打破被定型為花瓶的悶局。
鍾嘉欣
無綫花旦鍾嘉欣曾被批似花瓶，但去年在劇集《點解阿Sir係阿Sir》中喊得「鬼哭神號」，獲全城網民激讚演技，更入圍爭視后，成為最後5強。
Orignal From: 姚子羚感情驚弓鳥
沒有留言:
發佈留言