向來愛起用港姐拍戲的導演王晶，昨日在微博狠批候選港姐水皮、波平如鏡及糟糕，對住這份重口味的「雜扒餐」，連閱女無數的大導都耍手擰頭，更勸無綫：「冇女就唔好再搞啦！」
猶記得前年港姐選舉劣評如潮，在揀無可揀下選出三甲陳庭欣、張秀文及莊思明，連海外媒體CNN也以「豬扒盛會」來形容選舉，令港姐臭名遠播！無綫痛定思痛，去年立志提高佳麗水平，選出三甲朱晨麗、朱希敏及許亦妮樣靚身材正爭番啖氣。可惜事隔一年，無綫試圖以真人騷、素顏及淘汰賽等噱頭製造話題，卻忽略「主菜」質素！
網友鬧愈篩愈衰
自佳麗首輪泳裝照曝光後，網友狂插佳麗愈篩愈衰，有網友笑言：「原來真係有啲女仔着咗衫會吸引過冇着衫！」就連捧紅過不少港姐出身的「晶女郎」、導演王晶亦忍不住在微博留言踩多腳，對於老友陳百祥（阿叻）公開大讚今年港姐水平高，王晶特地為老友「解畫」，寫上：「我猜他是說水，平，糕！水皮個水，波平如鏡個平，糟糕個糕！」又嘲笑今年港姐行淘汰制，笑問能否全部淘汰兼再鬧無綫：「冇女就唔好再搞啦！孫泳恩（無綫首屆港姐冠軍）出番來選都仲有得贏！畀條生路行吓啦唔該。」
其實王晶及網友的評論並非無事實支持，叮剩的14位佳麗前日進行第二輪泳裝，身材平平、凸骨、皮膚敏感樣樣齊，慘不忍睹！佳麗穿上大會提供的掛頸式泳衣，冇個身材有睇頭，谷得最勁要數曾明俐，其次有朱千雪、張名雅及林泳淘等。
林泳淘壓力大跌Cup
而兩大熱門陳潔玲及湯洛雯繼續跌Watt，激凸肚腩仔的湯洛雯未見「起色」，頻頻縮肚凸肋骨，還繼續死撐：「我天生肋骨凸出，以前瘦都係咁！」同樣縮肚功一流的陳潔玲自認狀態非最Fit，會勤做運動，又例牌否認「後期加工」，問到會否素顏證清白？她卸膊：「呢啲唔到我話事，大會要我哋化妝見人！」而嚴重「漏奶」的林泳淘得戚地表示因壓力大由D降到C Cup。王舒銳則被發現皮膚敏感胸位一撻撻：「我掂吓都敏感。（塊面多粒粒？）之前考試壓力大，睇咗醫生。」
水皮
湯洛雯身材唔正兼胸骨凸，還死撐是「天生」，認真唔掂！
波平
陳潔玲未見胸凸，卻骨凸兼腩凸，令人睇到眼凸凸！
糟糕
林泳淘的泳衣似乎不太合身，出醜人前！
張名雅進身「Top 3」，狀態大勇。
第二輪淘汰賽中最後一位入選的卞曉帆，依然信心十足！
王舒銳皮膚敏感搞到胸邊一撻撻，大殺「峰」景！
被網友批質素差的尤蔭蔭，未知可否在泳裝環節挽回分數？
朱千雪穿上綁頸款的泳裝後，又再「升Cup」！
王晶在微博狂踩港姐，絕對冇面畀！（設計對白）
黃心穎疑放料 爆湯洛雯掟底褲
熱門佳麗湯洛雯與陳潔玲成為被爆料對象，前者被指有陳百祥偏幫外，又被指換內衣褲後亂扔，在酒店休息室被發現。對此，湯洛雯叔父湯鎮業激動地指爆料人大整蠱：「底褲點會周圍扔？仲要喺酒店樓下？冇可能發生嘅事！我都有同佢哋家人一齊住。」而湯媽媽亦力撐女兒是整潔的人。而陳潔玲則被爆外表清純其實句句爆粗、爛賭又爛蒲。有指謠言的始作俑者是官網人氣榜首的黃心穎，不過昨日有網民直踩其Fansbook中，指張名雅比她更有新聞價值，未知是否因而影響表現，泳裝不慎「漏奶」！
黃心穎
張名雅殺入決賽
大會早前公布首輪「Top 3」曾明俐、張名雅及湯洛雯，其中最高分的曾明俐直入決賽，昨日大會再公布第二位直入決賽佳麗是張名雅。第二輪的「Top 3」佳麗以學儀態贏分，張名雅最高分，其餘兩位是李渼琦和黃心穎。張名雅稱並非胸有成竹，宣布一刻心情緊張：「當時個心一半半咋！我唔會放鬆，保持最佳狀態！」提到跟藝人合照，她澄清只是在加拿大做主持時的「禮貌性」影相。而曾明俐睇好譚曉榆、岑杏賢及尤蔭蔭有機會爭奪餘下一個直入決賽的名額。
曾明俐不但得分最高，連上圍都最豐滿！
捧港姐做「晶女郎」
王晶早於80年代已慧眼識港姐，專吼樣靚身材正的港姐拍戲，惟近年晶哥對每況愈下的港姐看不上眼，寧在內地發掘「晶女郎」！
張曼玉（1983年港姐亞軍及「最上鏡小姐」）
18歲參加港姐的影后張曼玉，入行後即被晶哥吼實，二人曾合作電影《青蛙王子》及《摩登仙履奇緣》等。
邱淑貞（1987年入圍港姐最後12強）
邱淑貞當年參選港姐入圍最後12名時，突遭對手懷疑整過容，最終大會勸她退選，事件無阻其事業發展，獲晶哥力捧為「晶女郎」，八十年代後期屢次合作，經典作包括《最佳損友》及《精裝追女仔》等。
李美鳳（1987年港姐亞軍）
擁有電眼的李美鳳奪得港姐亞軍後，晶哥邀她演出《求愛敢死隊》和《精裝追女仔2》，極速在影壇上位。
Orignal From: 王晶踩港姐 張名雅直入決賽
沒有留言:
發佈留言