明日7.1是香港回歸15年，但一個時代的終結，只是另一個時代的開始，家駒留下來的樂與怒精神，早已植根八、九十後的腦海，猶當看到16歲少年鼓神敲打着曲奇餅罐演繹《我是憤怒》「 I never die, I never cry！」家駒沒有死，而是以另一方式延續。本報記者日前訪問了家駒昔日戰友，問他們倘若家駒在生，他正在做甚麼？葉世榮相信他會堅持音樂理念出個人唱片；黃耀明相信他會繼續夾 band；我們相信，他明日會穿起黑衣上街高唱：「沙不怕風吹，在某天定會凝聚！」採訪：陳玉琼、李全
Beyond這張在舊屋天台拍攝的照片，頗有《天與地》氣勢，家駒褲上寫着「熱血化碧濤」，燃燒了幾多年輕人的鬥志。
《相依的心》
黃家五兄弟姊妹，家駒排行第四，家強自小已十分崇拜二哥。
《相依的心》
《摩登時代》
Beyond於83年成立，當時阿 Paul仍未加入，四眼的家駒一臉稚氣。
《高溫派對》
Beyond五子絕版水着。
《長城》
家駒（左）88年在北京開騷，在長城留影。
《舊日的足跡》
家駒除了懂彈結他，連長笛也會吹奏，當年曾為《舊日的足跡》伴奏。
葉世榮：「佢想出個人唱片」
《 Beyond成員》
「家駒雖然走咗一段時間，我同好多 fans、朋友一樣，仲好掛住佢，基本上每日都會諗起佢，一齊玩、一齊做騷，最後為咗音樂理想，去咗一個唔熟悉嘅地方日本，間中仲會閃過發生意外嘅片段。家駒好開朗、健談，又有幽默感，我發夢成日夢到返番去 Beyond未紅時，我哋成日喺紅館平台玩遊戲。家駒太有原則，玩遊戲佢都好認真，要依足遊戲規則。」
「有機會再同佢唱歌」
「人生無常， Beyond雖然已經分開發展，我相信家駒會好明白，大家各自為自己理想各自奮鬥，如果家駒仲在生，我相信佢家仍然有好多音樂理想，喺日本嘅時候，家駒曾經講過想出自己個人唱片，佢家應該出緊個人唱片。
「不過我相信家駒已經去到一個好好嘅地方，呢個地方我哋將來都會去，只不過佢先行一步，我哋一定有機會再同佢唱歌。我哋係唔捨得家駒，叫佢唔好走，但當家駒靈魂離開軀殼，佢就應該放下人間所有嘢，離開呢個世界，唔好掛住我哋人間，放心去一個更美麗嘅地方，平靜嘅世界。」
黃耀明：「繼續做緊領導者」
《同期戰友》
「 Beyond同達明一派喺同一個時代出世，講起嚟真係好有緣，劉以達同家駒熟啲，我同家強熟啲，家駒同我同年同月生，我同家駒一樣歲數，大家只係相差幾日，好多佢感受到同經歷過嘅嘢，我都經歷過……」
「對音樂好狂熱」
「家駒係一個好好嘅音樂人、歌者、作曲人，留低咗好多好歌畀世人，我哋只可以拎住佢嘅經典舊作品，不停喺世上傳唱，《歲月無聲》、《情人》、《永遠等待》、《海闊天空》好多好多，我都好欣賞，佢嘅歌聲好獨特，好多 rock友都受家駒影響。
「喺1988年，達明一派同 Beyond合作過，好出名有兩首歌，啱啱今次演唱會都有唱，8月喺亞博嘅 Part2都會唱，《你還愛我嗎？》中間有段和唱，好明顯聽到家駒把聲，好似黑人咁喺度嗌，冇唱歌詞，只係唱嗰啲咿咿哦哦；仲有最後唱嘅副歌『我已經不懂得觀察真假』，家駒同 Beyond一齊唱。另一首歌係《沒有張揚的命案》，亦都係 Beyond幫我哋和唱。
「如果家駒仲在生，好明顯佢仲喺度玩音樂，佢對音樂好狂熱，其餘 Beyond三位成員都喺度玩音樂，家駒係火車頭，佢繼續做緊領導者。」
Dash：「一定仲夾緊 band」
《 Mr.低音結他手》
「我8、9歲已經鍾意 Beyond，第一次聽到 Beyond首《爸爸媽媽》，以為首歌係鬧阿爸阿媽，聽落之後，原來係講社會現象，即刻愛上 Beyond，覺得佢哋啲題材好特別，唔係淨係情情塔塔，我聽音樂同夾 band嘅起源，全因為 Beyond呢首《爸爸媽媽》，啲詞真係好犀利，好有前瞻性。」
「我想做跟班」
「好遺憾，我鍾意 Beyond時，家駒已經走咗，我只可以睇相片同錄影帶、聽 CD，夾咗 band之後，同 Beyond嘅 Paul哥最熟，我會有意無意之中問 Paul哥家駒以前嘅事，又會乘機問如果家駒喺度，佢會點睇……有種薪火相傳感覺。
「為《海闊天空》彈鋼琴部份嘅孫偉明，將家駒展覽其中一張相送咗畀我，我珍而重之掛咗喺 band房，畀我動力。如果家駒仲在生，佢一定仲喺度夾緊 band，我會做緊家駒嘅 roadie，即係跟班，幫家駒攞結他、遞結他，呢個係我夢想。」
陳海琪：「為李旺陽企出來」
《 Beyond好友》
「識佢哋時，佢哋揸住《再見理想》錄音帶，周圍搵人幫忙播歌，嗰時好多樂隊都已經簽晒唱片公司，係得佢哋冇人簽，我覺得呢隊樂隊好有心，自己行台。最難忘 Beyond去橋咀島演出，我做司儀，嗰度好荒蕪，要喺盂蘭節戲棚演出，只得零星觀眾，我哋傾咗好耐偈，講吓大家理想，家駒話我哋一定要展翅高飛。咁耐以嚟，家駒完全冇改變，見到肝膽相照嘅朋友，依然好長氣，如果有任何嘢，只要同佢持相反意見，佢會用講道理方法拗到底。」
一聲保重成永訣
「 Beyond去日本前一日，嗰時我喺 CR2（商業二台）做夜晚節目，嗰朝好奇怪，突然心血來潮，聽到 Beyond好早嚟咗電台做訪問，我突然好想撲返去見佢哋，所以飛的士趕返去，佢哋啱啱好做完節目，我哋企喺走廊傾咗一陣，家駒仲同我講，翌日我哋要去日本喇，我問佢，你哋幾時返嚟？佢話唔知吖，嗰度係新嘅市場，好大壓力，所以嗰時我一聲保重，估唔到係永別。
「如果家駒仲喺度，繼續控訴呢個世界嘅咁唔公平、唔公義，好似李旺陽事件，佢一定第一時間企出來。 Beyond係佢嘅生命，音樂係佢全部，佢依然會將所有精神放晒喺音樂。」
粉絲 Mavis：「阻梁振英做特首」
《現任寰亞集團宣傳部總監》
「鍾意 Beyond，係我媽咪叫我鍾意，媽咪喺電視睇到《阿拉伯跳舞女郎》 MV，媽咪話呢隊 band好好聽。嘩，又真係好好聽喎，嗰年我13歲。鍾意 Beyond時，佢哋仲未紅，每次只得三、四個 fans，所以 Beyond對我哋呢幾個 fans印象特別深。
「因為冇錢交學費，去咗報館做記者， Beyond拍 MV，我去探班，第一次畀佢哋知道我做咗記者，家駒反應好大，話『唔係吖？快啲返去辭職，記者行業好複雜。」但我覺得每個行業都複雜，可能聽 Beyond歌長大，無意中學咗佢哋人生態度—好堅持！
「有一日，喺日本採訪家駒受傷入院嘅同事，越洋打電話畀我話：『家駒走咗喇！』我冇流一滴眼淚，繼續工作，做完嘢，我匿喺公司廁所打畀媽咪，我忍唔住喊，不過媽咪比我喊得更厲害。」
「家駒叫我哋爭氣」
「家駒成日叫我哋爭氣，家駒走，令我知道呢個世界冇嘢冇可能發生，教曉我接受同爭氣，家駒永遠喺我心裏！家駒一向見義勇為，睇唔過眼嘅一定挺身而出，如果家駒仲在生，梁振英就會選唔到做特首。」
阿龔：「做咗住家男人」
《 Beyond前助手》
「家駒完全冇架子，係一個好開心嘅人，無論遇到乜嘢問題，佢都正面去諗，去日本發展，家駒睇得好正面，佢覺得終於有香港人，或者講中文嘅音樂人，開始喺日本落腳。
「 Beyond fans好特別，每個 fans都個別鍾意某一個成員，唔會一個 fans鍾意晒 Beyond四子，雖然大家各自支持一位偶像， fans之間唔會爭風呷醋，相處得好融洽。試過一次因為太大班 fans衝上港台，將港台大堂玻璃撞爛。」
做騷前食清音丸
「家駒生前有個喜好，每晚做完嘢送佢返屋企，好鍾意幫襯佢屋企附近一檔食喳咋，佢又好鍾意食普通嘅嘢，飯盒佢最鍾意，可能同佢平民出身有關，好隨和，而做騷前，佢一定要食一粒清音丸。
「我幫 Beyond做到佢哋第一次去日本，之後因為長時間留喺日本，日本嗰邊請人幫 Beyond，如果家駒仲在生，佢一定仲係見到乜嘢都哦一餐，嗰時有句說話：『家和萬事興，家駒口不停。』佢有啲似阿伯，嘮嘮叨叨，乜都哦一餐，又或者佢已經做咗住家男人，一啲都唔出奇㗎，以佢個人絕對有咁嘅可能性。」
Leslie Chan：「家駒未必會結婚」
《 Beyond前經理人》
「 Beyond喺83年成立，下年30周年，我同 Beyond由85年合作到92年，家駒人生最大轉變係跟港台去完新幾內亞探訪返港，親身經歷過第三世界，眼界睇遠咗，處事亦成熟咗，我哋去到當地教堂，教徒會喺教堂內彈結他，氣氛好輕鬆，完結後大家互相擁抱，家駒好詫異，同我講，可以同陌生人擁抱嘅咩？睇到佢感覺到人同人之間嘅關懷。」
「好遺憾去咗日本」
「家駒對音樂比較自我，不過佢知道 Beyond要生存落去，就要同市場妥協，但又唔可以太流行，又要保留 Beyond風格，佢嘅堅持實在唔容易，佢每行一步都孭住咗全隊樂隊責任，但家駒做到咗。 Beyond經歷過兩次低潮，出完第二張碟《阿拉伯跳舞女郎》，同第三張碟《現代舞台》之間，嗰年係88年，家駒冇乜心機，好失意，佢亦冇乜出現；第二個低潮，好遺憾去咗日本，差不多20年後嘅今天，如果問我與 Beyond之間遺憾事，最遺憾唔係同佢哋打官司、更加唔係後期同三子交惡，而係冇機會完成我同 Beyond一同征服日本市場夢想。
「如果問我有冇後悔安排 Beyond去日本？最近整理番 Beyond嘅合約，睇番我同 Beyond最後一張合約，嗰張係92年1月1日嘅錄音合約，合約結束日期係93年6月30日。人逃唔過命運！去到日本， Beyond好奇問日本公司佢哋嘅日文名，家駒叫 Koma，家強第一時間好大反應話，阿哥你個名唔老嚟，昏迷咩，家駒只係哈哈笑吓，反應冇乜嘢，最後，好遺憾家駒真係昏迷， Koma與英文 Coma同音， Coma即昏迷，改變唔到嘅事實！
「去到日本發展，我俾日本公司 Amuse隱形咗，唔畀我參與，喺家駒出事後，我同家駒已經結咗婚嘅前度女友、同埋家駒嘅好朋友飛咗去日本，去到醫院，日本仔攔住我，話家駒昏迷緊唔見得，第二日睇新聞報道話家駒噚日已經過身，我好難過，與我同行嘅家駒朋友，原本可以見家駒最後一面，但係因為我，而冇得見佢最後一面，呢個係我最難過、最內疚嘅事。」
《海闊天空》講愛情
「我相信家駒已經輪迴，開始咗另一階段，如果家駒仍在生，佢一樣都係對音樂好堅持，不過可能會輕鬆好多，唔需要再考慮市場，做自己喜歡音樂，我相信佢雖然已經50歲，但佢未必會結婚，《海闊天空》好多人都覺得係勵志歌，但以我了解嘅家駒，其實係佢對愛情嘅睇法。」
Orignal From: 黃家駒逝世19年專輯 再見家駒
沒有留言:
發佈留言