橫看豎看，翠如都弱不禁風，絕不似是變節之人，她加盟有線9年，有時真想她會呆在有線一世。未為新東家拍劇，翠如已活生生上演了一幕《翠如2012之變節》，到底為何不做鎮台之寶，走向敵方做二打六炮兵？真的令人費解也！她說：「哈哈！我真係變節呀，由娘家有線嫁去夫家無綫囉！」簡潔的幾句，沒有任何矯飾，英雌也！
四方財路
其實翠如拍完有線一個旅遊特輯後，頓覺跌入五里霧中，人世間的不平等令她反思人生的種種，不願去想，也不願去做，更不願去理，改變才是唯一的出路，她說：「之前我喺Cable（有線）拍咗一年孭背囊節目，去過好多窮地方，拍完後好迷惘，仲試過因為抑鬱去睇醫生！我知道要重組人生，係時候停一停，做完呢個Project，我就休息咗半年。」半年後，翠如發現紅簿仔連錢都有麻煩，雖說思考人生重要，但有米落肚似乎更重要，坐食山崩真的說不過：「嗰時真係窮到燶，如果再唔工作真係連我都遺棄自己，係時候返回現實。咁啱有線、無綫、now同王維基都有搵我，但我好想試吓拍劇，會唔會去TVB同王維基比較好？」
翠如絞盡腦汁，認為變節事在必行，既然有選擇障礙症，倒不如由舊東家決定，她說：「我同Cable關係好好，所以問佢哋應該點揀，佢哋知我想拍劇，有高層同我講應該揀無綫，其實我都係咁諗，心思思想試吓TVB威力有幾大！」她續說：「Cable首肯，點傾都得，當時有前輩介紹我畀樂小姐（樂易玲），我話想拍劇，佢一口就答應，咁我就簽咗TVB！」
甘做綠葉
問題來了，翠如由一個開國功臣，變成敵國之兵，世間豈有今非昨是、每況愈下之理，但翠如不以為然，變節只想改變一下自己而已：「真係好想睇吓自己去到乜嘢影響力，喺無綫即使係二打六，隨時都好多人識，做一個有人識嘅綠葉都幾好。我初到貴境，呢度任何一個演員都有經驗過我，冇諗過去到邊個位置，我諗自己唔會做花旦喇，做花旦冇晒自己嘅生活，做綠葉幾好，壓力冇咁大，又可以坐享收成！」
後記：穩中求「變」
有時難聽是變節，好聽就是變通，做人千萬不要死板。我們去了一間餐廳歎茶，那裏甚麼餐都有，就是沒有翠如想吃的菠蘿油。小記說：「去第二間吧！」她說：「求其啦！唔想走來走去！」就如在有線冇劇拍一樣，結果她選擇走，倒是反常！
黃翠如獲舊東家有線支持拍劇，加強轉投無綫的決心！
對人生多了體會的黃翠如，毅然放棄做鎮台之寶。
黃翠如為旅遊特輯走訪世界各地，更一嘗泥漿浴的滋味！（資料圖片）
黃翠如（左起）與李思欣、莊思敏、羽翹及陳僖儀合作無綫節目，她並不介意「靠邊站」。（資料圖片）
變出錢途
變節又豈只翠如一個，過往有很多藝人曾變節，即使穿梭幾個電視台，都一樣游刃有餘！
陳啟泰 TVB > ATV
陳啟泰在1990年經朋友介紹進入無綫，當主持並演出劇集，可惜發展平平。直到1998年約滿後決定過檔亞視，最後憑遊戲節目《百萬富翁》打響名堂。
田蕊妮 ATV > TVB
田蕊妮於1993年參加亞視舉辦的《未來偶像爭霸戰》而加入亞視，在劇集《縱橫四海》有突出表現，其後於2006年底轉投無綫，演出多套電視劇，並參與主持節目工作。
張可頤 TVB > CTI
張可頤於1994年參選港姐，2003年憑劇集《九五至尊》獲得「本年度我最喜愛的女主角」，今年她與無綫約滿後轉投王維基旗下的城市電訊，並成為「一姐」，與無綫結束近廿年的賓主關係。
Orignal From: 黃翠如變節豁出去
沒有留言:
發佈留言