捱了十三年，終於有名有姓，也不一定代表平步青雲，傳媒每次拍得他跟好友張智霖夫婦飯局，總會在他的名字前不懷好意地加上「奀星」兩個字，而動詞則例牌是「黐」。
「我相信好多人都係咁諗我，以前細個聽到係會嬲o架，但依家冇乜唔開心。無可否認，我啲朋友都係紅過我、有錢過我，我同Chilam識咗好耐，我自己冇做過一個咁嘅舉動（黐），我啲朋友亦都冇咁諗過我！有時講呢啲說話嘅人，都只係眼紅、膚淺啫！」
然後，偶爾被雜誌拍到他在街上拍拖，行街食飯是女友Tina找數，又指他靠女友接濟。
「我覺得冇乜問題喎！我哋拍拖都十年，我又唔係含住金鎖匙出世、大富大貴，我搵錢能力又唔高，正常男女拍拖，都係倆口子一齊捱，梗會有時食飯你畀，有時食飯我畀o架啦！」
我以為，唯唯應該會對入行這些年有很多怨懟，但結果，「捱過咗，我反而覺得個天待我不薄！」三十三歲的他聳聳肩說。
米粉度日
梁烈唯九九年由契媽穿針引線下，接拍志雄哥的《監獄風雲之少年犯》而入行。本來曾幻想可以像劉德華、郭富城般做大明星的他，入行後才知是另一回事。
諗番起，我開頭拍電影嗰幾年，根本冇人識，係直至我入TVB拍《青出於藍》做壞學生，啲人先開始知有我呢個人，呢啲就係電視嘅力量！不過之後，我做嘅角色，大多數都係「功能人物」，好多人都只係知我嘅存在，而噏唔出我叫乜嘢名。
入行以嚟最辛苦、最唔掂嘅，一定係經濟！我個戶口成日都係零蚊。嗰陣拍電影時仲細個，一套賺萬幾蚊至幾萬蚊，一出糧就亂咁使；入咗TVB，大家都知人工係點，我爸爸嗰陣仲講笑咁話我：「你份人工，只係比菲傭多少少咋！」
嗰陣我住喺我女朋友赤柱屋企，每個月一出糧，我就去超市買嗰個月食嘅嘢，乜嘢孔雀牌、特惠牌米粉，一袋有五、六個，冇調味料，要浸到淋先可以煮嗰啲；再買啲特價水餃，同埋啲唔易爛嘅娃娃菜、椰菜咁；出外景都仲有飯盒，但拍廠景，我就會揀canteen最平十一個半嘅飯食。有時喺屋企食厭咗米粉，就用十四、五蚊買四個雞尾包，兩個當做下午茶加晚餐，兩個做第二日早、午餐。雖然已經盡量慳，但每到月中，就已經係糧尾，惟有更加慳住使。
《飛虎》神槍手「阿源」一角，令唯唯人氣急升。
在一眾《飛虎》男角中，唯唯最的骰，但其角色卻最突出。
冇錢做Gym
日子過得刻苦，唯唯坦言，○七年拍《緣來自有機》時曾想過退出算了。「嗰陣我好多懶音，成日人做笑柄，覺得自己好冇存在價值。跟住就走去跟人學做DJ打碟，點知仲搵到錢。」正打算全職做DJ之際，卻又給他拍了一套《尖子攻略》。
我覺得個天對我幾好o架！我都冇諗過可以拍番套《尖子》做壞學生，竟然會被提名「飛躍進步」同「男配角」獎，公司又簽埋我management。
我又因為拍《尖子》識咗晨曦B隊嘅人，我就跟咗佢哋去踢波。有次校長（譚詠麟）同我講：「你身形咁單薄，做前鋒，人哋咪撞埋嚟，你都已經跌低啦！仲話做呢行？做呢行嘅鬥志就更加要比人強！」聽完之後，我就決定去做gym。
《缺宅男女》中的「關二哥」，畏妻性格深得師奶歡心。
我好記得，第一年入南華會做gym，我因為冇錢交年費，捉咗我阿哥去碌卡，然後嗰幾年我嘅娛樂，就係每日去做gym，好正o架！嗰度有報紙、雜誌、電視、冷氣，又有廁所，又有得沖涼。我試過屋企個花灑爛咗，覺得冇必要買住，就用住條膠水喉代替，又或者直情做完gym喺南華會裏面沖埋涼，順便去埋廁所，連廁紙都慳番！
做gym呢幾年，我試過中間因為冇錢交月費，停過一、兩個月冇玩。我由上身着44碼，操到依家要着46，校長跟住見到我都話：「嘩！你操到個骨架直情變咗另一個人咁呀！」仲叫我keep住依家呢個shape！
雖然依家我經濟叫好啲，但之前有好多個月，我為咗交月費做gym，喺好多方面都要扣減啲使費，不過都值得嘅。
在台慶劇《大太監》中，他將飾演慈禧太后（米雪）兒子同治帝。
唯唯（右二）跟阿Bob（右一）等人主持《Big Boys Club》，獲得不少年輕粉絲。
破產家境
個人經濟情況不濟，就是他本身的家庭環境，也好不到哪裏。他家中上有一個年長他一歲的哥哥，父親本來從事塑膠製品公司，小時候一家四口生活小康，可惜隨着生意下滑，梁父於○二年卻破產收場。
我爸爸破咗產之後，最慘係連兩層樓都變咗負資產，屋企自此之後都係靠我做銀行嘅哥哥撐起。跟住我哥哥同爸爸被人「坤」咗簽份銀行文件，原來份文件係要我哥哥負責晒其中一層樓嘅所有債務！層樓仲爭成一百九十幾萬，仲要佢三個月之內要還，你話一個升斗市民，邊有可能無端端攞咁多錢出嚟？咁即係要我哥哥破埋產啦！呢件事我好嬲o架！
唯唯（右一）跟張智霖與袁詠儀（左一）夫婦老友鬼鬼，年前曾被拍到在西苑慶祝生日。
我好記得，喺○九年踏入一○年嗰晚，我返阿爸阿媽屋企食飯。原來當時佢哋住喺元朗一個分咗三戶嘅丁屋度，佢哋住喺中間，得一個好細好細嘅窗，部電視要放喺張餐枱度，冇位擺梳化，要食飯又要入去一個好細好細嘅房，我一路食一路好內疚，覺得自己依家住喺赤柱咁舒服，但佢哋養到我咁大，就住喺個咁嘅地方。結果，我就鼓起勇氣同佢哋講：「我唔可以畀你哋住喺啲咁嘅地方！」我叫佢哋畀一年時間我，幫佢哋搬離呢個地方。
嗰餐飯，我同我阿媽都狂喊，嗰種感覺，我只可以話係好心痛、好內疚！百感交集！
跟女友Tina拍十年，唯唯說，早已視對方為自己家人了。
梁家不死
翌日，唯唯即致電給經理人，告訴對方家裏這樣的情況。「嗰一年，我乜鬼嘢都接嚟做，一千、二千、三千都做，做好多mc job，又狂拍劇，乜劇都拍，乜角色都做，就算拍一集，一個鏡頭都拍！」一年後，他終於實踐了跟父母說的承諾。
我好記得，我嗰陣仲拍緊《飛虎》，有朝早收，我就同阿爸去飲茶，然後就帶佢去睇屋，見佢鍾意就即刻簽埋約，將之前賺到啲錢一次過畀晒上期、按金，同半年租，我阿媽知道之後，仲鬧我阿爸點解唔睇住我，畀我做咗個咁鹵莽嘅決定，我就同佢講：「我租得呢度，就一定搞得掂嘅，只要你哋住得開心就得啦！」
其實當時我個心不知驚！半年後我又會點呢？我份糧根本cover唔到個租！惟有keep住不停咁拍嘢。試過有個月第二日要交租，但我都未有錢，本來諗住問人借，跟住就試吓check戶口睇吓有冇啲out job出咗糧我又唔知呢？哼！點知真係有喎！我好記得，嗰一吓我睇到有錢，我真係覺得個天對我好好，我真係好感動o架！
雖然呢個過程好驚險同辛苦，但我依家個心真係對屋企嘅責任感大咗好多！我依家只係想好好照顧我屋企人，包括我女朋友，我父母年紀開始大啦，我唔可以再懶惰，所以我依家要趁《飛虎》呢個勢再做好啲，再努力啲！我好想話畀嗰陣「坤」我哋屋企嘅銀行知，你搞到我爸爸、阿哥破產唔緊要，梁家仲有我，我哋係唔會死o架！
大隻仔與神槍手
其實，梁烈唯口口聲聲所說的「再努力啲」，到底是怎樣努力法呢？
對他來說，關鍵其實在於夠不夠主動。「《飛虎》呢個角色，係我自薦做，我本來只係同監製講，我想喺套劇裏面做賊，但監製之前原來睇過我喺一本時尚雜誌影裏面教人健身嘅相，佢話：『吓？唔好！你身形咁fit，梗係做飛虎啦！』就係咁，我就做咗呢個又cool又型嘅神槍手『莊卓源』，而呢個角色所帶畀我嘅反應，亦都係我入行以嚟最好嘅一個！」
另一個例子，是拍《女拳》。「嗰陣《女拳》試造型，我見到監製羅永賢咁啱喺服裝間，我借啲意企响佢隔籬着衫，畀佢睇到我嘅身形，點知，真係work喎！監製一見到就話：『嘩！唯唯，原來你身形咁o架？』跟住佢就即刻叫造型師，唔使畀啲乜嘢衫我着，連鈕都唔使扣，結果出到嚟，『小』個角色都幾eye-catchingo架，因為大家都冇諗過，我原來會有個咁嘅身形嘛！」
係囉，係囉，如果呢輯專訪相，唯唯都可以「再努力啲」就好囉。
唯唯相當滿意現時的鋼條身形，不時更玩自拍張貼於微博。
Orignal From: 非苦男 梁烈唯
沒有留言:
發佈留言