最近無綫小生緋聞多多，馬國明就被列入為筍盤，他對此笑說：「我都唔知點解，係無端端，以前一路都係講阿 Mo（陳豪），我覺得只要你鍾意嗰個人，佢咪係你嘅筍盤囉，邊有得界定㗎。不過我已經好極力去扭轉大家對我呢個觀念，萬一將來有乜嘢唔好嘅消息傳出，我怕反差好大，我都係正常人，事實上我都有好多缺點，只不過係大家唔知，好似我份人一向都冇乜情趣，有啲女仔會覺得我好悶，呢啲咪係缺點，不過傳媒對我真係好包容，唔使小小嘢俾人寫都好肉酸，反而經過大家嘅包裝，咪話我呢啲叫老實。」
馬國明自言有不少缺點，筍盤之名不敢當。 攝影：葉君海
無綫劇《 On Call36小時》中醫生角色張一健討好，令馬明人氣急升。 劇照
馬明在《回到三國》中的搞笑演出被指浮誇，他表示願意接受批評。 劇照
開闊戲路怕被定形
問馬明有否因此而被這枷鎖纏身？他說：「我又冇喎，我唔會因為多人留意而有壓力，我一直都處之泰然，演員唔好畀自己壓力，放鬆去做每一件事，效果可能會更加好，只要你敢搵我做啲好衰嘅角色，我又可以去到好盡喎，我梗係唔想自己俾人定咗形，希望可以試多啲唔同嘅角色。」
不過事實證明，當《 On Call36小時》播映後，馬明飾演醫生角色張一健（一件頭），的確為他帶來不少迴響，人氣急升，直到剛播映完的《回到三國》，反而惹來不少批評聲音，不少人覺得他演出浮誇，似乎筍盤這框框容納不了浮誇，他說：「可能鍾意一件頭啲人，唔鍾意我做呢類搞笑角色，但係作為演員冇所謂，梗係乜嘢角色都做吓，如果我套套都係做一件頭，我諗大家好快會覺得悶。」
馬明續說：「《回到三國》作為搞笑戲，我覺得 OK㗎，我平時出街都好多小朋友話鍾意，反而係網上啲觀眾迴響最大，我見到有啲人會將呢套劇同內地套《三國》比，我覺得有啲唔係咁公平，亦唔係好認同，宣傳片已經話畀大家知係一套搞笑片，不過呢啲嘢真係冇乜好拗，純粹係個人喜好，所以我都會尊重啲唔鍾意睇嘅人。」
有傳力追胡杏兒，馬明自言感情事隨緣。 資料圖片
與胡定欣情已逝，馬明否定翻撻的機會。 資料圖片
同胡定欣劃清界線
印象中過往馬明有份演出的劇集，似乎未試過有這麼多聲音，連他自己亦忍不住說：「多㗎，其實呢套劇拍嗰陣已經有爭拗，可能因為之前拍宣傳片嗰陣，司馬信呢個角色係吳卓羲做，但係到開拍嗰陣又換咗人，結果咪搞到啲 fans唔鍾意，嗰陣已經好多人鬧，但 TVB不嬲拍宣傳片只不過係話畀人聽今年有乜嘢製作，開拍嗰陣監製係邊個都唔知，如果換咗人而搞到你唔開心，我只可以講聲對唔住。」
談到大家關注的感情生活，一時傳馬明與胡定欣翻撻，一時又指他力追胡杏兒，他笑說：「冇目標，隨緣喇，我唔明點解成日話我同定欣翻撻，我哋一路係朋友，分咗手之後冇去過街，我冇乜所謂，我諗佢都唔介意。」
馬明今年站穩一線小生位置，銀機會陸續有來。
着重家庭樂
馬國明今年事業方面的發展，令他站在一線小生的位置，他自己亦不諱言今年是發展最順暢的一年：「係㗎，不過未算豐收，但係都叫做有啲甜頭，唔好捱完得個桔，算係支持你繼續去做。跟住啲工作已經排得密麻麻，我都希望可以再做好啲，最好有多啲搵錢嘢。」
馬明續說：「我諗暫時都唔會有時間返內地拍劇，我都知酬勞真係好好，但係相對喺香港嘅發展會暫停，凡事有得有失，間唔中返去拍梗係冇問題，但係我唔可以長駐喺內地，始終成家人都喺香港，唔可以離開屋企太耐，我好珍惜同佢哋相處嘅時間。」
Orignal From: 有話兒：馬國明筍盤唔易做
沒有留言:
發佈留言