大家好，我係張智霖Chilam！我由出道到依家，都畀好多人話我好似食咗防腐劑咁，其實我覺得係大家抬舉我啫，每個人都會自然地慢慢老去；我之所以keep到，我諗多少同我嘅生活習慣或者性格有關。
首先我做好多運動，例如踢波、游水同跑步等，近年我又食得清淡啲，少肉多菜，不過最重要都係心境，我經常保持幽默感，又鍾意講吓笑，其實如果遇到一啲難關，唔好咁執着，笑住去解決，皺紋都會少啲！其實我亦唔係天生樂觀嘅人，我都有遇過低潮，好似唱歌事業停滯不前，電視劇唔收得，電影票房又唔好，不過人生總係要有喜有悲先會豐盛！
張智霖對於被指吃了「防腐劑」不會老，笑言太抬舉他。
Chilam熱愛家庭生活，珍惜一家相處的時光。
張智霖說年紀大了，覺得平淡是福，更懂得珍惜與太太袁詠儀的相處。
每日一電
有人話我太太袁詠儀（靚靚）好火爆，相對我就比較隨和；我覺得每個人嘅性格都有好壞之分，太太性子急啲我就慢啲，但咁樣大家相處先至有火花。每一對情侶或者夫妻都應該要學習妥協，學習欣賞對方！可能大家都覺得我會係個幾浪漫嘅人，其實我就冇乜花臣，但會盡量畀安全感對方令佢安心，好似大家每日最少都要通一個電話，唔會好似無尾飛陀咁！
親親爹哋
同埋就算幾忙，每個星期都一定會一家三口食飯，依家有咗個小朋友，成個關係唔同晒，基本上可以話係成個生活唔同晒，因為連平日活動都轉變晒；太多二人世界會變得悶，有咗個仔之後係另一個階段，我覺得健康好多，起碼大家溝通都多啲。
父子同樂
珍惜親子
曾經睇過一本書，話父母要同一陣線，唔好一個做好人，一個做衰人，我哋嘅角色都係咁，教小朋友係一門學問。有咗個仔令我享受多咗家庭生活，好珍惜同個仔嘅相處時間，因為光陰飛逝，依家啲小朋友好早熟，再過多幾年就唔需要你嘅庇蔭，所以我好珍惜！
至於會唔會想有第二個小朋友？坦白講我想有個女，男仔一般都對囡囡有情意結，不過我係個「呷醋外父」，我會接受唔到個女第時有男朋友。
享受人生
其實人大咗，心態都會轉變，以前自己掛住做嘢，依家反而享受平淡同平靜嘅生活。同埋年紀愈大，應該愈要懂得享受人生，因為人生不如意事十常八九，要學識開心面對，唔需要刻意強求，依家覺得健康就係財富；雖然呢啲說話係閒話家常，但好多人都要活到某一個年紀先了解，包括我！
洗臉會磨沙
早前Chilam與太太靚靚一同擔任Lancome新店開幕剪綵嘉賓，他認為男士們護膚最重要是清潔，每天他洗臉時會加入一些磨沙；他笑言自己護膚方面不會太花巧，因為太「潤」反而會長暗瘡。
留鬚添佬味
Chilam在新戲《大叔我愛你》中，與年僅22歲的內地女星付夢妮發展忘年戀；不過天生一張孩子臉的Chilam，即使「忘年」也未感突兀，他更要刻意留長鬍子來增添「佬」味，羨煞不少人！
採訪：Ada Lam
Orignal From: 張智霖靚靚凹凸三人世界
沒有留言:
發佈留言