男友心痛「博」火
陳美詩（Macy）去年在日本拍攝旅遊節目時遇上車禍，能逃出鬼門關全憑其冷靜機智，她說：「出事嗰一刻，我第一時間大叫咗一句：『耶穌救我！』當大家都唔知點算時，好彩我仲識打001報警！如果嗰時連我都騰雞嘅話，後果就真係不堪設想！」
Macy在日本出事時，男友孫耀威（Eric）冒着得罪無綫的危險，為女友在微博發聲，對於男友如此肉緊，Macy表示深深體會到男友的愛意：「如果佢唔肉緊我就死啦！其實佢一直都好愛我，當然有事時佢會再緊張啲！」問到會否因感動而下嫁Eric，她說：「總之佢求婚嘅話，一定要夠Surprise我先會應承，哈哈！」她又透露媽咪恨抱孫：「阿媽冇催我結婚，但有催我生仔，其實都好鍾意小朋友，如果將來我結婚組織家庭，都想生小朋友！（理想生幾多個？）生到幾多就生幾多啦！其實我不時都會幻想將來嘅Dream Home會係咩樣，所以平時最鍾意逛超級市場同傢俬舖。」好一個賢妻良母！
早前面對突如其來的意外、得悉生命是如斯脆弱後，Macy坦言對人生的態度都來了一個大轉變：「以前淨係專注工作，而忽略咗同屋企人同朋友嘅相處時間，入咗TVB拍劇後，我可以話係On Call 36小時，唔好話見吓屋企人，根本連基本嘅食飯同瞓覺時間都冇，但依家我更加珍惜身邊人！（更珍惜Eric？）唔止佢，因為我覺得生命要拎番個平衡，依家我一得閒就會約舊同學同教友聚會，因為冇人知聽日會發生咩事！」樂觀的Macy提到意外，笑言只是玩了一次過山車：「好彩有神！玩咗一次過山車，做一個特技節目，又冇大損傷，豐富咗我嘅人生，多咗經歷，仲有助我將來演戲，層次豐富咗，係神嘅恩典！」
因禍得Job
俗語有云：「福無重至，禍不單行！」早前有傳Macy因高調談論車禍而遭雪藏，但她澄清：「公司冇雪過我，其實我只係有段時間休息冇拍劇！當時我病假都未放完，公司就叫我主持《開館有益》，仲臨時加多咗集數，另外又多咗Event搵我做主持同司儀，我又可以接多咗廣告，其實我係間接多咗Job，真係有賺！」
入行8年的Macy自爆初入行時曾經歷低潮，但全憑網民及觀眾的支持，令她能堅持留在娛樂圈發展：「最初搵唔到錢，而且已經付出所有青春、心血同努力，都只係希望有人認同，當睇到網民嘅反應就真係好鼓舞，覺得都值得嘅，令我繼續做落去！做演員工作唔穩定，又冇覺瞓，就算身邊好友同家人畀好嘅反應我，都只會怕係氹我！」
後記：男仔頭女兒身
訪問當日，Macy身穿工人褲現身拍攝場地，她笑說：「大家冇可能喺鏡頭前見到我咁男仔頭嘅一面，因為我要顧及形象，但事實上我性格係好男仔，哈哈！」Macy更活像一個大細路，每當攝影師的鏡頭稍一鬆懈，她便立刻以搞笑表情配上可愛甫士，要求經理人為她拍下調皮的一刻！
陳美詩想生小朋友，但暫時未有婚期！
陳美詩（左）車禍後回港接受治療，出院時由男友孫耀威接送回家。（資料圖片）
一直愛得低調的陳美詩與孫耀威，曾被拍得一同睇籃球賽，兩人大為尷尬！（資料圖片）
陳美詩車禍後工作量大增，與胡諾言一同主持節目。（資料圖片）
豁達的陳美詩，將車禍視作過山車，更從中反思人生。
Orignal From: 陳美詩等做驚喜新娘
沒有留言:
發佈留言