2011年11月15日星期二

羅仲謙肉麻WhatsApp Love楊怡

FACE週刊第234期

封面

收起拳頭　羅仲謙肉麻 WhatsApp Love楊怡

2011年11月16日

傅穎（Theresa）8月底自爆被大隻男友羅仲謙毆打分手，由於二人屬同一經理人公司星皓，星皓為保上位中的羅仲謙，不惜將傅穎雪藏，男主角卻繼續風流快活，除了與落選大胸港姐蔡慧欣暗交外，更成功溝掂無綫花旦楊怡，不過兩人非常小心，出入都部署周詳。

楊怡近排頻頻返國內拍劇，為解相思之苦，羅仲謙最近都轉咗部iPhone 4，並裝上通訊apps Viber及WhatsApp，方便跟身在外地的女友密密傾，卻百密一疏在WhatsApp的status打上「心錫羊羊錫心」的圖案，正式降服大他5年的姐姐楊怡。

我已經心有所屬
暗交五個月，羅仲謙喺WhatsApp公開「錫」楊怡，真係好揚吓喎！

27歲羅仲謙集郵狂，證明傅穎冇亂噏插男友，週一更正式解凍，勝利回歸。據知羅仲謙跟楊怡早前被拍到半夜BBQ，星皓已對羅仲謙起疑心，近日更得知兩人堅撻着，由被告變原告的Theresa，沉寃得雪解凍，2個月零收入的她，本週一以勝利姿態風騷出席活動，正式復出。

迫住招供
據知羅仲謙被Theresa爆大鑊後，公司對男方採取信任態度，為保羅的星途，更即時把Theresa拋入雪櫃，下令她封口。當時，羅仲謙對公司誓神劈願話自己被屈，知情人士說︰「其實公司老闆（王海峰）對佢（羅仲謙）都半信半疑，而且傳佢同楊怡時，佢仲大大聲話自己唔鍾意大自己咁多嘅女仔。不過，Theresa爆大鑊在先，激嬲老闆，先放佢入雪櫃。」

直至今個月初，終於有雜誌拍到羅仲謙同楊怡拍拖BBQ，加上楊怡不避嫌欣賞羅仲謙的同志舞台劇《我的基本生活》，公司人員才恍然大悟，嗱嗱聲召羅仲謙返公司照肺，大話謙冇得避，只好焗認戀情。

WhatsApp示愛
羅仲謙跟楊怡自從6月中開始行埋後，為冧掂呢位TVB一線花旦而一改暴躁脾氣，唔玩拳打腳踢，改玩手機小玩意。

據知，入行多年都用BlackBerry手機的大隻謙，最近終於換上iPhone 4，為的都是氹楊怡。知情人士說︰「楊怡開始返國內拍劇，有人教羅仲謙裝WhatsApp同Viber，傾電話send短訊都免費。」可能啱啱先識用WhatsApp，羅仲謙竟然在status打上「心錫羊羊錫心」的圖案，愛到出晒面！

月頭被拍到凌晨BBQ，羅仲謙才被迫向公司承認與楊怡戀情。

錫羊羊
羅仲謙喺WhatsApp嘅「狀況」上打咗「錫羊羊錫」，明顯話自己好愛楊怡，有啲骨痺喎！

爭搶花球
週日（13日），羅仲謙為王浩信婚宴擔任兄弟。據現場目擊人士透露，大隻謙雖然又要招呼賓客、又要陪飲，但每隔幾分鐘，他就拎部iPhone 4出嚟猛send短訊，當時差唔多11點，原來楊怡夜機由昆明回港，羅仲謙更向助手示意要早走，好明顯互報行蹤。

直到拋花球環節，羅仲謙突然跳入姊妹堆話︰「今晚我要搶花球呀！」全場「O」晒嘴，不過大家認為羅仲謙飲大兩杯而沒有理會。結果，花球果然跌落羅仲謙和一位女賓客中間，羅即時執起花球，新娘子陳自瑤為他打圓場，叫佢錫啖女賓客，點知羅突然爆出一句︰「我已經心有所屬㗎喇！」全場再「O」嘴。

玩自拍
搶到花球之後，羅仲謙即刻自拍，send畀邊個？好明顯啦！

玩電話
唔知係咪婚宴之後約咗楊怡，成晚羅仲謙都坐唔定，一係玩電話、一係飲悶酒。

趕住走
話晒做兄弟，未散場羅仲謙已經想早走，有冇搞錯呀？

趕住見
週日晚，王浩信婚宴未散場，羅仲謙就撇，楊怡夜晚十一點到港，時間啱啱好，仲唔趁機會一見解相思咩！

傅穎：會祝福囉
羅仲謙楊怡蜜月期，難得傅穎終可放低被毆陰霾。週一（14日），傅穎一早便到髮型屋扮靚，明顯精神奕奕，而且笑到四萬咁口，記者恭喜Theresa終於解凍，佢就話：「其實出番嚟做嘢已經好開心，我同公司呢段時間多咗溝通同共識。」問到羅仲謙終於同公司公開咗同楊怡戀情，會唔會祝福佢哋？Thersea：「如果你問我會唔會，我會答會囉，我會祝福每一個人。」

傅穎解凍攞彩
難得重見天日，Theresa終於放低被毆陰霾，本週一，是她2個月來首次出席公開活動，一早便到髮型屋扮靚，染了一頭黑髮的Theresa明顯精神奕奕，而且笑到四萬咁口。

溝女絕招
1. 扮前輩對新人，扮前輩教路。
2. 觀音兵 24小時隨傳隨到。
3. 扮深閨每次工作後密會女伴，會先與助手回家，製造返屋企冇節目假象。
4. 出面食從不帶女伴回家

為楊怡棄十三船　大胸港姐傘陣護駕
羅仲謙6月初因拍攝《On call 36 小時》結識楊怡，當時羅仲謙跟傅穎剛復合，但到台灣為《香港小姐》拍製作特輯時，已經跟13號、上圍有34D嘅蔡慧欣暗交，還有北京的正印蔡小姐。羅仲謙入行短短6年，計埋從未曝光的北京正印，足有13位他口中所謂的「好朋友」。