徐子珊希望另一半是醒目仔能讓她增廣見聞。
相處最重夾嘴形
徐子珊坦言從小沒想到要結婚，因為不知道婚姻是怎麼一回事，不過人長大了，對婚姻已變得不抗拒，更閃過婚後息影的念頭。
如果遇到啱嘅對象會唔會閃婚呀？呢個Concept幾得意，但我從來冇諗過自己結婚會點，十幾歲都同阿媽講過我唔會結婚，因為唔知結婚係做緊乜嘢，唔係話抗拒婚姻，可能始終未遇過一個好match嘅，覺得要永遠喺埋一齊嘅人，所以就冇諗呢樣嘢。頭先話唔想搵圈內人做另一半，唔係話試過唔啱先唔再喜歡，我唔鍾意喺同一工作環境識男朋友，好似辦公室戀愛唔知點咁，因為兩個人相處需要好多話題，如果同一公司識嘅人都一樣，話題就會窄好多。
子珊坦言現在有圈外人追求，但一切仍在觀察中。
身材不俗的子珊不介意穿上低胸衫大騷事業線！
若然大家拍戲做男女主角，我接受唔到，想將工作同私人嘢分開。拍戲難免會有親熱戲，第時另一半如果介意應該會同我講，但嫁咗我就唔做嘢啦，息影啦，我有呢個Idea，但通常我諗嘅嘢都唔成事哈哈，可能到時又會唔捨得息影呢，今年唔知下年事，隨心啦，太刻意都無補於事。
渴望演愛情小品
徐子珊選美出身，加入無綫後飾演過不少角色，包括警察、律師、富家女等等，可塑性相當高，如今返璞歸真，希望能演出愛情小品，帶出純愛的一面。
今年工作大計係積極拍劇，之前拍嘅劇都一次過出晒街啦，驚今年冇嘢出街，努力嘅都只會出到一套劇，中間有時間會去拍電影，我不嬲影視兩方面發展，但就冇出碟計劃，依家傾緊套戲。其實我成日做唔同嘅嘢，今年想拍多啲愛情故事囉，純愛嗰種，之前拍得太多硬線嘢啦，好似警察咁，觀眾會悶，fans又會投訴，佢哋覺得我大個啦，可以試其他角色，所以我想拍愛情小品。呢期拍緊《雷霆掃毒》，個角色原先係一個啤酒拳手，受到好多波折後去販毒，係一個停留喺低潮嘅人物。拍戲冇話抽離唔到負面情緒嘅，如果我嗰日負面都係因為落雨啫，我係一個好需要陽光嘅人！
冇精力陪後生玩
曾與多位男星傳出緋聞的徐子珊，原來十分抗拒跟圈內人交往，認為大家在同一個圈子內共事，彼此話題會減少，火花自然亦不多，子珊渴望將來的另一半是圈外人之餘，亦希望可以教懂她很多東西，更坦承現階段十分恨拍拖！
做呢行一定要有桃花，觀眾緣都係桃花嘅一種，拍唔拍拖就隨緣啦，我都恨o架，我覺得都差唔多要拍拖啦，咁多師姐妹結婚生BB幾咁開心呢，加上依家觀眾比較接受藝人有另一半，好open mind嘅，人就係人，生活要平衡，拍拖都係生活一部分，現階段都有人追嘅，但要睇清楚，追求者係圈外人，我唔鍾意圈內人，好悶o架，大家同行拍拖時間好難夾到，例如你拍早場，我拍夜場，時間都唔規律好難就，但最主要都係我希望另一半可以教到我嘢，大家做同一行，見嘅世界一樣，唔夠勁。
我又冇話特別鍾意做邊行嘅男士，最重要係大家有共同嗜好、taste。最好型啦，望埋去要smart囉，係醒目仔，要溝通到，年紀大過我啦，冇話要大我幾多嘅，但我暫時未試過同大過我十幾年嘅人一齊，所以未知得唔得，但我諗應該唔會有太大問題。之前啲男朋友中，最大嗰個大我幾年啦，因為品味相若先會一齊，年紀差太遠又唔得嘅，如果佢太細個，成日喺度玩，我都冇精力陪佢玩啦，唔通同佢落維園踢波咩？哈哈，廿歲係做呢啲嘢啦，所以我揀男朋友最好係年紀相若，性格同品味都要相若，咁樣先會啱話題。
性感女神多得媽咪
很多男人覺得子珊是「性感女神」，對此她不敢認同：「性感只係感覺，係人哋話我性感啫，我嘅性感定義唔係咁，人哋覺得我係，我又唔會苦惱，人哋觀感我控制唔到嘛。係唔係天賦我唔知呀，我阿媽會覺得奇怪囉，點解個女會性感o架？哈哈，因為佢由細到大都覺得我係爽朗活潑嘅細路仔，聯想唔到我同Sexy掛鈎，你覺得我性感，惟有多謝媽咪啦，其實我性感準則係女仔睇女仔都好有sexy appeal，或者咁講，呢樣嘢好Natural，覺得一個人好吸引，未必係隻眼或者係個嘴，而係性格、談吐。」
後記：魅力惹緋聞
聲線柔弱、感覺傻更更和外形嬌滴滴的女生向來大受異性歡迎，但訪問過程中，子珊表現得十分爽朗，而且對答如流，反應很快，絕不是嬌柔的小女人，何解她會如此惹緋聞呢？原來，當子珊拍照時，她可以即時收起「男仔頭」性格和銳利的眼神，然後擺出女人味極濃的甫士，這證明爽快和聰明的女孩子，只要適當時候散發女人味，一樣不愁無男人追。
口述：徐子珊
筆錄：李惠儀
攝影：沈健程
服裝：DKNY
Orignal From: 徐子珊冧醒目仔 婚後息影
沒有留言:
發佈留言