今日好玩嘢
《心戰》大熱沙畫師自學之路
2012年06月06日
《天與地》每集都播片尾曲〈年少無知〉，當堂令首歌 hit爆；家陣《心戰》片尾唔播歌，改 喺出字幕前加插每集唔同 嘅沙畫片段配演員旁白，一樣捧紅呢種表演藝術，有心人專登每晚 cap低啲片 up上 YouTube，勁多人話想學，問邊度有堂上？之不過，幫《心戰》畫沙畫嘅藝術家海潮話唔一定要人教，只要有心，自學都得！
呢張相唔係就 angle，海潮係可以咁橏調轉頭畫隻馬出嚟。
海潮 profile
《心戰》宣傳亦以沙畫做主題，海潮都有出席，佢表演完仲有鄭少秋作狀去畫。
原名蔡錦潮，有 20年藝術表演經驗，涉獵範疇包括各類繪畫、木偶戲、話劇、舞蹈等，正宗周身刀，而且多數都係自學而成。 2004年同藝術家老婆組成「全劇場」，從事不同表演工作。網址： http://www.alltheatreco.com
原本構思：女角畫沙畫
戚其義近幾套劇好鍾意加入一 啲表演元素去呼應劇情，《天與地》有搖滾樂， 嚟緊《金枝慾孽 2》有崑曲，《心戰》就玩沙畫。海潮話阿戚最初接觸佢時，係打算搵佢教演員畫，但佢就鍾意自己上陣。「 嗰陣個劇仲係構思階段，阿戚話想講其中一個女角識畫沙畫，唔知係邵美琪定陳茵媺，於是聯絡我。但嗰時我個女喺加拿大出世，我要飛過去陪老婆同女，個期夾唔到。」
沙畫成功引到好多人注意，逐晚 cap低 啲片上載到 YouTube，片中亦能見到海潮戴帽 嘅身影。
海潮消化完每集劇本同旁白，就搵出 嗰集主題，再決定畫乜，好似第 1集旁白係徐榮飾演 嘅變態殺人魔講「人失去重要嘅嘢」，指邵美琪被斬手，於是海潮就特別畫 咗一對手。
早過演員有劇本
過一排阿戚再搵海潮，改請佢幫手拍沙畫片尾，仲畀晒 30集劇本海潮睇，連 嗰 30句旁白都有埋。「我諗我係當時極少數睇過劇本嘅人，就連演員都係飛紙仔先知每日拍乜！睇完劇本，覺得好有意思，同一般 TVB電視劇好唔同，於是答應 咗。阿戚仲畀我自己構思畫 啲乜，佢一 啲都冇干涉，我覺得呢次合作好好！」
通常海潮會喺發光燈箱上畫沙畫，再 喺上高掛個 DV錄影或連接大芒播畀現場觀眾睇，《心戰》 啲片都係咁拍成。
海潮仲話佢鍾意用一 啲抽象嘅景物去暗喻戲中意境，例如呢幅出現 喺主題曲時出現 嘅畫，有個人行樓梯走近太陽，其實係想表達秋官個角色有堅持 嘅信念。
憑〈一絲不掛〉走紅
海潮 喺 2008年先開始自學沙畫， 2010年就憑陳奕迅〈一絲不掛〉 MV而聞名，之後好多 event都請過佢表演。由於香港好少人玩呢種藝術，上 Google搵香港沙畫師，多數係出佢個名，好自然戚其義就搵 咗佢幫手。
2010一絲不掛
海潮話因 MV導演鍾意佢 啲木偶戲，所以就請佢 喺 MV表演，而咁 啱當時沉迷畫沙畫，所以就諗出投射沙畫去陳奕迅身上 嘅一 take過表達手法，官方段片至今更有近 300萬點擊率。
2010頭條新聞
《頭條新聞》編導亦係睇 咗〈一絲不掛〉個 MV， 喺 2010年搵海潮合作， 喺節目中加插沙畫元素。
2012沙兵馬將
海潮自己個劇場更將沙畫融入戲劇之中， 嚟緊 7月會上演一齣《沙兵馬將》，佢自己既係演員又係沙畫師，全程個幾鐘用沙畫講故仔。
一 take過畫完
海潮 嘅想像力同創造力都好強，佢叫我出題畀佢畫，我叫佢畫希臘風景，佢本身唔知係點，但只係聽我描述 咗少少，諗 咗一陣就畫到呢幅似模似樣 嘅作品。
畫 30集《心戰》沙畫，海潮都只喺一日內用咗 12個鐘就搞掂，全部一氣呵成畫完，每集 NG唔超過 5次。好多人睇完都問：點解可以畫到咁快，有冇用快鏡？「我畫沙畫不嬲以快為主，但都一定要用快鏡，因為 30秒畫到 嘅 嘢唔多，限時亦會帶畀我壓力，所以要求阿戚任我盡情畫完，然後佢 哋用快鏡縮短到 30秒。」訪問期間筆者睇海潮即場畫多幅有《心戰》咁複雜 嘅畫，多數都係 1、 2分鐘搞掂，中間完全唔使停、唔使諗，好堅！
5大秘招 O晒嘴
海潮話佢細細個就鍾意睇漫畫，大個後畫 咗好多年畫後，先至學畫沙畫，有咁深厚 嘅畫功根底，唔怪得 3、 4年就有咁好成績。但話同其他沙畫師相比，佢嘅風格比較寫真，而且會雙手作畫。「開頭我用右手畫多，後來專登練埋左手，家已經可以雙手合作畫，左手仲多數用 嚟畫細緻嘅嘢添！」現場表演時，佢仲勁到可以 upside down咁畫成幅畫，睇到我 O晒嘴，於是乘機請教，佢就透露 咗以下 5招。
打圈掃沙
海潮鍾意用呢招 嚟做 background，貪 啲沙夠自然均勻，畫花瓣亦係用呢招。
壓指畫翼
《心戰》沙畫經常出現有翼 嘅人，其實係靠尾指平壓沙面，逐忽羽毛掃出 嚟。
指尖慢挑
海潮多數時間都大刀闊斧，但畫到仔細位，好似大幅風景畫中 嘅人，都會用尾指指尖慢慢畫。
鋪沙打底
海潮畫 咗呢兩隻杯做例，右邊杯中間保留少少沙，再畫出反光位，形像會比左邊豐富，所以建議先鋪層薄沙打底，再勾畫物件輪廓。
撒沙再吹
畫抽象 嘢時都會大堆沙咁撒落，跟住仲可以用口吹，就會產生意想不到 嘅效果，好多時都有驚喜！
沙畫=繪畫+表演
單係用沙畫到一幅靚畫都未夠，沙畫最好睇之處係畫面會不斷變化，從而串連成動畫。海潮都話初學時其實係想整動畫。「沙畫係一個好好 嘅媒介去拍 stop motion動畫，我好希望可以用沙畫，表達 Tim Burton式 嘅黑色古仔。」後來佢更意識到，沙畫直頭可變成一種表演，「配合形體動作同音樂，我快速去畫畫 嗰陣，自己就等如 喺舞台上表演，已經唔只係繪畫咁簡單。」的確，睇佢畫畫時做出帶點功夫味道 嘅動作又真係幾賞心悅目！
每次表演海潮都會戴帽，因為要防止飛沙入眼，非表演時畫，仲會戴埋太陽眼鏡，避免直接望住燈箱 嘅強光。
唔計 projector或拍攝器材，海潮 嘅表演裝備只得價值萬幾蚊 嘅燈箱 1個，同大堆 喺水簇鋪買到 嘅普通幼沙。「唔係表演，就用乜畫都得，新手唔使擔心裝備唔夠。」
海潮話只有好似呢幅畫 咗兩粒鐘咁耐 嘅大作先會影低留念，其他普通 嘅畫通常都係畫完即抹。
劉心悠 4月主演 嘅舞台劇《直子小姐》，都有用沙畫講古仔。不過劉心悠話自己冇學過畫， 啲畫係劇組預先搵畀佢扮畫。
奴 COMMENT
iPhone都畫得
我有睇《心戰》呀！ 啲沙畫好勁，好有淒美感，真係唔知點解可以畫得咁快，身邊已經有人話想學。我覺得 iPhone可以出沙畫 app喎，都係搵手指捽捽吓之嘛！
海潮唔開班
家好多人都有興趣學沙畫，可惜海潮話自己唔識教人，所以唔會開班。「間唔中都有人上門話想跟我學，但我只會同佢分享少少心得，啟發佢 哋去自學，當年我都係自己上 YouTube睇外國表演去揣摩。」不過，香港都有其他沙畫師會不定期開班，想跟師傅學，不妨留意吓。
海潮話匈牙利大師 Ferenc Cako早 喺 30幾年前已畫沙畫，係佢其中一個學習對象，以前成日上 YouTube搵佢 啲片睇。
2003年 Cako喺首爾表演呢幅《創世紀》，被喻為沙畫經典， 喺網上瘋傳，好值得參考，但大師畫得比海潮慢好多。（ YouTube搜尋「 Ferenc Cako」）
本地另一著名沙畫師馬穎章（馬仔），現正同基督教家庭服務中心合作開班，但課程將於本週完結，暫時未知會否再開，有興趣記住捕實。
（查詢： 2342 0640）
Orignal From: 《心戰》大熱沙畫師自學之路
沒有留言:
發佈留言