劉心悠讓路　殼王欽點 JJ做骨妹

2011年09月07日

朝中有人好辦事，如果仲係老闆撐腰，上位快人一步。

自殼王陳國強入主無綫後，旗下 SNAZZ一班星仔水鬼升呢，以 JJ賈曉晨最把炮，今年開劇冇停手，剛拍完《耀舞長安》（原名《樂府藏龍》），本月底再得殼王「點燈」，喺《怒火街頭 2》做大陸骨妹，仲同兩位男主角李璨琛和鄭嘉穎有唔少對手戲，角色搶鏡程度拍得住首集「索腿天后」陳敏之。有殼罩，連角色都度身訂做啦！

28歲 JJ賈曉晨，雖然非無綫親生女，但自今年 1月殼王入主無綫後，屬殼王旗下 SNAZZ嘅 JJ，喺無綫愈撈愈掂，拍嘅角色亦愈來愈重要，好似之前拍攝嘅《飛虎》就由原先得兩集大茄，變為全劇大奸角。

我好努力做戲㗎！（真實對白）
連埋《怒火街頭 2》， JJ一年拍 4套劇，角色由大茄變到第二女主角，話唔定年尾攞獎都有份！

JJ角色原本由劉心悠飾演，可惜 TVB要佢簽一年藝員合約，最終由 JJ搶食成功。《蘋果日報》圖片

做骨妹最啱你！（設計對白）
有殼王撐住 JJ，上位速度快咗好多，但 JJ最近喺微博就話自己冇靠山，又話咁樣係「多年的努力都抹殺掉喎！」

微博撐努力

早前 JJ上廣州為 TVS3南方綜藝台《快樂邀請》做嘉賓，夜晚就喺梧州夜場登台搵真銀，認真多嘢做！

度身訂做

上月中剛拍完《耀舞長安》（原名：樂府藏龍），趁空檔 JJ上週四連續三晚喺廣州登台搵真銀，做足 3晚穩袋 20萬人仔。忙完登台，月底 JJ又即為新劇《怒火街頭 2》開工。

《怒火街頭》今年彈出，最高收視有 35點，更令鄭嘉穎翻生有機爭視帝，開拍續集，自然個個吼實。 JJ執到好籌，在《怒 2》飾演一個國內新移民，在深水埗做骨妹，原本角色屬意由劉心悠演出，但最後筍位落喺 JJ手。

「呢個骨妹角色由頭帶到尾，個角色原本搵劉心悠㗎，但最後變咗 JJ，仲特登改埋設定，話佢喺大陸落嚟，等 JJ名正言順講嘢唔正，唔使俾人笑，大家都知咩事！」知情者說。 JJ有殼王照，硬搶劉心悠飯碗，但佢就話：「唔係你哋咁諗，係監製陳維冠同編審覺得適合我。我好努力做戲㗎！」冇話你唔努力喎，係話你有人睇住啫！