當年歐陽震華（Bobby）由藝員訓練班開始學基本功，眨眼間在娛樂圈已打滾了29個年頭，演技愈來愈老練，但身邊的女拍檔就愈來愈年輕。最初拍檔有陳秀雯、關詠荷、陳妙瑛、郭可盈、宣萱及蒙嘉慧。到了近年，在他身邊出現的女演員，竟然變了後生一大截的楊怡、胡杏兒及鍾嘉欣，Bobby笑言：「吳啟華當年30幾歲扮10幾歲嘅張無忌，我點都唔夠佢狼！」
在劇集《不速之約》中，Bobby與楊怡飾演情侶，拍造型照當日，楊怡在記者面前笑說，「與Bobby演一對老夫少妻！」搞到Bobby不知好嬲或好笑，幸好向來以轉數快速見稱的他，即時還擊：「睇妳靚得幾耐吖，下部劇可能做我後母呀，睇吓邊個老得快！」
的而且確，Bobby的最新女拍檔，又換上再年輕一點的鍾嘉欣，在《樂府藏龍》新劇裡，Bobby除了要被鍾嘉欣暗戀外，並且會跟胡杏兒有感情戲。
曾是Bobby的老拍檔蒙嘉慧（YoYo），有日在化妝間對他慨歎說：「做女演員好唔抵，當年與你演一對，下一部劇可能要做你後母。」Bobby聽後就問YoYo，若是那樣妳又會否接拍？YoYo表示完全不介意，反而覺得好玩，一定會接拍。
身為TVB一綫小生多年的Bobby解釋：「其實這個現象一直存在，但男演員在這方面比較優勝，好像荷里活老牌男星米高德格拉斯，配20多歲的女拍檔都無問題。香港都有吳啟華做代表，當年他30多歲扮10多歲的張無忌，我不夠他狼！好多人猜我40多歲，換身分證時，老婆說我是全場最後生的那個……年代不同了，好像郭峰黐了頭套，都似仲係40多歲，仍然好弗。」
老婆100分
談到熱播中的劇集《不速之約》，Bobby與林峯分別飾演人、魔角色，究竟Bobby喜歡做人還是魔鬼呢？
「我覺得阿峯演這個魔鬼做得好好，為演好角色，他要經常戴住紅色隱形眼鏡，好辛苦，我自問做不到……」因為Bobby不戴隱形眼鏡，雖然他本身有散光加老花，但至今也不敢去做矯視手術，雖然他聽太太說，「矯視手術好簡單，只會聞到一陣陣的燒雞翼味。」他說有時男人比女人更細膽，單是看鬼片，太太就比他大膽得多，所以這個老公永遠不會陪太太看鬼片。
細膽老公，是否一定要襯個惡死老婆？Bobby的太太傅潔嫻，傳聞是惡妻一名，今日Bobby就趁機會為太太來個大平反，他形容老婆入得廚房，出得廳堂，到了外面又好識做，畀足面老公，Bobby還無厘正經的說：「我叫佢行，佢唔敢坐；叫佢坐，唔敢企呀，倒轉都係一樣，因為我性格反叛。」他又試圖解釋老婆「惡死」的原因，「梗係，傳媒追住我太太影相，企定定的靚相不會登，只會揀晒那些目露凶光，個樣惡死，無張好樣，係人都會嬲啦！」
叫TVB反省
在00年曾以《洗冤錄》一劇奪視帝的Bobby，問他今年會否看好林峯及楊怡兩位拍檔攞獎？他抵死的說：「林峯話視帝不會是他，其實他謙啫！我睇好他，早幾年阿峯就應該攞。不過講交情，我就撐老友謝天華得『醉街男主角』，如果天華落敗，恐怕嬲過07年我的《賭場風雲》落空。講真，天華今年成績不錯，計人氣及氣勢都好大機會。」
至於楊怡又會否奪視后？Bobby就大讚她說：「楊怡好勤力，我更肯定她沒有整容，識阿怡多年都是這個樣，如果她整，我都整了。（哪林峯又有沒有整？）唔覺，沒有親眼看到，不會信。」
輪到自己，Bobby又會否渴望攞獎？他又一貫嘻皮笑臉的說：「入圍《艾美獎》那年都無着落，同無綫絕緣，哈哈！以前頒獎禮無論甚麼獎項都掃到1、2個，依家唔想阻住個位。（陪跑心態？）不要這樣說，成日我陪咩？每年11月好忙要出埠，畀其他人陪吓！年紀大，跑得幾多？」
近年無綫資深藝員買少見少，Bobby有感而發說，每年台慶頒獎禮應表揚一班資力深的藝員，「老人獎」及「綠葉獎」當然沒有人願意拿，但若換成「最佳學習獎」又好聽又有鼓勵性。說到底，他覺得無綫不應放走羅蘭姐、谷峰、駱應鈞、元華、劉兆銘等這班資力深、演技厚的藝員，沒有他們襯托，難拍出好戲，希望無綫好好反省。
喜愛夜蒲
「夜蒲」是Bobby保持青春開心的最佳方法，他稱平日拍劇要記大堆對白，人會變得好緊張，所以拍完劇，他會自動刪除所有記憶。而通常收工，他總愛約三五知已摸酒杯底，他覺得夜蒲未必是壞事，反而有推動力，大家玩紙牌骰盅，傾吓飲吓好Relax，「做人喺適當時候要懂得放鬆，否則條橡筋好容易會扯斷。」
Bobby最愛收工摸酒杯底，「做人要懂得放鬆，否則條橡筋好易斷。」
07年憑劇集《賭場風雲》角逐第35屆美國艾美獎最佳男主角獎項。
Orignal From: 歐陽震華家有賢妻
沒有留言:
發佈留言