不滿遭冷待 馬浚偉怒撇無綫

不滿遭冷待　被阻拍國產劇
馬浚偉怒撇無綫

無綫小生花旦的逃亡潮忽如決堤，近日連效力 18年的馬浚偉也劈炮唔撈。據悉導火線源自他不滿主演的《紫禁驚雷》結局高收卻被冷待，同時又有人為他推走拍國產大劇的機會，令他憤而向無綫高層樂易玲要求提前解約，怒極馬仔曾跟好友吐苦水：「今次我真係死心！」

無綫小生花旦逃亡潮如走馬燈，一個走完又一個。繼迷雲黨中堅王喜，以及佘詩曼、林保怡、蒙嘉慧和廖碧兒等離巢後，最新走佬成員是另一雲派成員馬浚偉。不過有傳馬仔今次離巢一肚氣，跟被指與志雲暗鬥的藝員部揸弗人樂易玲更搞到不歡而散，明年 6月才約滿的他於上月向樂易玲要求提前解約， 18年賓主關係一刀切。


馬浚偉加入無綫 18年一向表現不俗，專啃豬頭骨古裝劇，做主持唱主題曲任勞任怨，但劇集高收零慶功兼被阻財路，難怪他求鬆縛，向無綫提前解約。設計對白及圖片



樂易玲力撐愛將黃宗澤和謝天華，出席《潛行狙擊》祝捷活動以示支持。資料圖片



馬仔主演的《紫禁驚雷》結局收視高企，可惜零慶功。劇照

訴苦水：我真係死心

馬仔昨日在將軍澳電視城拍攝新劇《當旺爸爸》，見他表情嚴肅，似乎心情麻麻。

馬仔早年已加入無綫，到 06年正式賣身簽下經理人合約成為「親生仔」，此後以接拍古裝劇居多，每年亦有份提名視帝，但次次冇份攞獎，又難免酸溜溜。

除了視帝夢難圓外，馬仔也未有機會接拍國產劇，反而吳卓羲、黃宗澤及郭晉安等都先後走上人仔路。據悉，馬仔在數月前被徐小明斟拍明年在中央台播出的 50集史詩大劇《建元風雲》，其他演員尚有胡軍、呂良偉和佘詩曼等。雖則馬仔是二線男角，但戲份不少，且參與中央台製作是藝員的黃金機會，其薪酬更三級跳可賺約 150萬人民幣，豈料有人為馬仔推劇，據知馬仔得悉後十分氣頂，成為解約導火線。

另一方面，馬仔主演的《紫禁驚雷》上月底播映大結局，該集最高收視達 40點（ 255萬觀眾），與《潛行狙擊》最高收視打成平手，不過《潛行》大鑼大鼓慶祝，《紫禁》就零祝捷，馬仔為此大感失望兼冇癮，加上有推劇事件催化，上月他遂向樂易玲提出劈炮唔撈。消息指出，無綫高層對此事大為震驚，認為一線藝員流失情況嚴重，有人即翻兜《建元》劇組補鑊，馬仔雖可成功接拍，但其解約之心依舊堅決，他更向身邊好友吐苦水：「今次我真係死心，好冇癮！」

談解約：明朗化再講

左起：胡軍、呂良偉和佘詩曼與徐小明合作的國產大劇，馬仔幾經轉折終可入組。資料圖片

昨日記者向馬仔求證是否與無綫解約時，他在電話中支吾以對：「多謝大家關心啦，我同公司係傾緊一啲問題，過程有啲複雜，有啲嘢令我有少少唔舒服，但詳細內容唔方便講。」有傳馬仔和樂易玲就推劇一事不歡而散，馬仔說：「總之 Hillman（其直屬藝員部經理人）話畀我聽上面話唔得，我係幾唔開心，呢件事仲處理中。」「上面」是指哪人？馬仔笑說：「呢個唔知啦。」接劇「唔得」的理由是甚麼？他說：「公司政策，話唔知乜嘢要喺香港播先得，話個個藝員都係咁。」

提到《紫禁》結局收視高卻零慶祝，馬仔說：「呢個係公司決定，自己都想慶祝，或者安排未必配合到，所以冇任何慶祝啦，其實咁多年嚟我都慣慣哋咯。」之前馬仔曾在訪問中暗示有離巢之意，他是否會離開無綫？他不置可否：「我合約出年 6月滿，遲啲先算啦，但我自己係有好多嘢諗緊，等明朗化啲再同大家講。」馬仔所言似對無綫感失望，他則說：「我好鍾意 TVB，好有感情，但公司牽涉太多嘢、太多人，將來嘅事將來先算。」

對於馬仔提前解約，樂易玲昨在電話中說：「係咩？等我了解吓先，佢仲有一段時間先約滿㗎。」有傳馬仔不滿《紫禁》被冷待，樂易玲則謂：「慶唔慶功係製作部同外事部負責，唔係我負責。」至於推劇一事，她說：「消息唔正確，已經幫佢接咗，佢下個月會拍。」

馬仔預報劈炮驚雷

馬仔在微博留言慨嘆道：「熱視春夏暑趕至，冷待松竹梅傲現。」擺明不滿遭冷待。

馬浚偉主演的《紫禁驚雷》上月 26日播映大結局，雖然收視不俗，但無綫在當日和事後都未有任何慶祝活動。其實馬仔和該劇監製梁材遠，連日已在微博玩「單打賽」暗示被冷待。

單打暗箭橫飛

播大結局當日，材叔在微博說：「《紫禁驚雷》拍聶多寶（馬仔）考侍衞時上高台，有來自四方的箭，預咗，明箭、暗箭、毒箭、病態的箭、惡意追打的箭、無的而放的箭。結果，放箭的人消失了，今日你射人，明天人射你。」馬仔回應他：「哈哈 uncle材，咁多箭，難防啊！不過我乃常山趙子龍一身是膽打不死的！」馬仔其後又說：「在如此混亂不堪、邪念橫行的俗世中，堅持一己信念，死守正途，到底是否可行……我依舊相信，邪不能勝正！」

8月 30日材叔得知劇集收視高企，他跟馬仔說：「自己飲咖啡。」馬仔自嘲：「飲可樂得唔得？」翌日材叔上載開香檳的 CG相，示意慶功望梅止渴。其實上月馬仔提出解約後，也在微博留言露端倪：「遊戲，不一定要玩下去。值得留就留、該要走就走！」

威水史：四奪最喜愛電視角色獎

《洛神》劇照

下月便 40歲的馬浚偉入行 18年，歌手出身的他轉型拍劇打響名堂，在無綫經典劇集《十月初五的月光》演出司徒禮信一角嶄露頭角，與張智霖、唐文龍及佘詩曼搞四角戀牽動全港觀眾，此劇成 00年最高收視作品。 01年他拍《勇往直前》演出練馬師贏得我最喜愛的電視男角色一獎，奠定一線小生地位。他之後陸續憑 02年的《洛神》、 03年《帝女花》及 06年的《鐵血保鏢》四度奪同一殊榮，惜始終與最佳男主角無緣。剛播完的《紫禁驚雷》結局最高收視達到 40點，他還唱該劇主題曲，又因口齒伶俐不時擔任節目主持，最近他主持的《大廚出馬》收視亦不俗。

---

Orignal From: 不滿遭冷待 馬浚偉怒撇無綫