2011年9月3日星期六

黎耀祥認周麗淇新抱仔

這個年代,不少中國人仍忌諱姊弟戀,傳統思想深入骨髓。當年黎耀祥曾戲言,囝囝正橋必娶周麗淇(Niki),眨眼間囝囝已長大得力壯如牛,面對當年的隨口噏,祥仔認為只要囝囝首肯,即使在傳統思想圍牆下,承諾亦可隨時兌現,祥仔這個阿爸真爆炸!

Niki自言喜歡與黎耀祥合作,因為雖然對方貴為影帝,但卻全無架子。
Niki自言喜歡與黎耀祥合作,因為雖然對方貴為影帝,但卻全無架子。

N:周麗淇
L:黎耀祥

黎耀祥與Niki在受訪期間不時互笠高帽。
黎耀祥與Niki在受訪期間不時互笠高帽。
Niki坦言不接受男友與自己有太大年齡差距。
Niki坦言不接受男友與自己有太大年齡差距。

仔大仔世界給予話事權

N:其實我應該叫你做老爺!

L:當然啦,以前我個仔成日都跟我開工,佢好鍾意靚女,一見Niki開心到呀,成日借啲意同佢傾偈,我叫佢嫁畀我個仔啦。

N:我嗰時口響響叫佢大個啲就追我,點知依家咁大個,高過我。

L:以前童養媳都係咁啦,搵個女人返嚟湊大個仔,跟住嫁畀佢,幾好呀!

N:介意個新抱大過個仔?介唔介意佢係男定女?

L:唔介意,我尊重每一個人,同每個生命,唔係你話事,呢個世界邊個有權為人哋嘅嘢話事?

N:如果第日我老爺係咁真係冇憾!

L:你當我老爺咪得囉!

N:依家問題係我兩個得,但你個仔唔得,哈哈!阿仔會問我你幾歲呀?原來係你個仔對我唔OK呀!不過,我唔反對姊弟戀,但我哋真係太大年齡距離。

L:現實真係有啲壓力嘅!兩睇啦!

N:如果真係同正橋一齊,其實我介意,佢三十幾歲時,我都四十幾歲,會嫌棄我,我對自己冇乜信心啩!如果佢大少少就OK!

L:愛情我已經歷咗咁多,其實真係要睇夾唔夾,同兩個人係咪真係可以行嗰條路,好緊要,同個樣冇關係,無論男定女都會老架啦。

N:但男人花心?

L:會,問題係你戰唔戰勝到嗰樣嘢!不過男人真係花心,天生!只要女方唔介意佢花心就唔使驚。

N:我未豁得出去。

L:遲早啫!等你年紀大啲就得!

N:仔大仔世界,個仔鍾意男仔都冇問題?

L:當然冇問題啦,佢鍾意就得,不過我個仔一定唔會啦!

N:同正橋講:細佬,鍾唔鍾意女朋友大過你?

橋:得,冇問題!

L:有時睇到啲新聞話個仔鍾意同性,畀着係我個仔會點呢,其實冇所謂,因為愛一個人唔使理人點諗。就好似教仔一樣,好多人都鍾意逼個仔學琴、學畫,學呢樣學嗰樣,但你有冇問個仔想唔想做先?

N:咁我係咪你理想嘅新抱?

L:梗係,又靚女,又乖……個樣,事實唔知啦,要相處過先知。

N:哈哈!老爺真係幾中肯。

L:我好老實架!

幫拍檔記埋對白

N:其實同佢拍戲嘅感覺真係好好架,任何人同祥仔拍戲,我冇聽過話唔好囉!佢攞獎一刻我真係好感動,佢個人攞唔攞獎都冇乜所謂,攞到都唔會有高高在上嘅感覺,佢只會多謝,就如常繼續工作,呢種態度唔係個個都得。

N:當時拍《秀才》好多嘢講,有時陳豪嘅對白記唔到,祥仔都幫佢記埋,我哋就話如果大家都唔記得,不如叫祥仔記,但我問過你,點解會咁少NG?你話過同以前讀書有關係。

非親生仔女一樣有機會

L:我本身好鍾意中文,我係一個八股佬,鍾意詩詞歌賦,因為細個冇乜嘢玩,我哥又好鍾意中文,背詩好叻,可能係遺傳,我十幾歲就背唐詩,兄弟之間就鬥背唐詩,我第一首背嘅係李白嘅《將進酒》,係一個好好嘅練記性方法。我有時唔NG唔係因為我記晒啲對白,而係我消化咗啲內容,就算我將對白主動被動掉轉,我都可以用語言兜番,而令嗰句合理!

N:好似我拍添哥嘅《如意狼君》,其實真係好多俚語記,不過劇本寫得好順,所以我好容易去消化,劇本真係好緊要!

L:哈哈!如果添哥開套劇畀我哋,你覺得乜片種會適合呢?

N:《難為了家嫂》!哈哈哈!

L:其實真係好難諗,不過添哥唔鍾意拍時裝,古裝、民初戲劇世界會闊啲,時裝太多限制。再唔係《家.春.秋》都得,我做你老爺囉!再唔係唔好做你老爺囉,做你大伯都得!

N:做情人得唔得?

L:得,連劉松仁同周海媚都得,有乜唔得呀!最重要睇番個角色,唔係講到我得廿幾歲,又或者講到Niki四十幾歲,要就番對方,唔好夾硬去拗。

N:我成日覺得人有樣睇,你個樣係一直變,我覺得係相由心生,你外形感覺真係唔同。

外闖完走返娘家

N:其實我同你都冇簽TVB做經理人,大家都有啲似,同樣都得到唔少演出機會,所以就打破出面傳聞話親生仔女先可以有機會。

L:最緊要做好自己,每個人路唔同,要適合每個人個性,我就好適合做電視,我出面闖過,走返嚟,知道我原來係一個好怕陌生嘅人,我拍電影每日嘅Location都唔同,每次班底都唔同,有時真係好尷尬。我只能同你講TVB係點,出面嘅世界要自己去感受。我好支持Niki簽TVB,經理人出面,會令自己更加舒服。

Niki融化Cool爆正橋

正橋如今已是雄赳赳的男子漢(高過祥仔),只見他甚為寡言,很Cool。事隔多年,再見Niki姐姐,他Cool爆的性格即時融化,由Cool變得害羞,再由害羞變得熱情,與Niki談天說地……不禁令祥仔說:「呢杯新抱茶飲得落!」

正橋數年前遇Niki,已對「姐姐」一見鍾情。
正橋數年前遇Niki,已對「姐姐」一見鍾情。
黎耀祥思想開通,不介意囝囝搞姊弟戀。
黎耀祥思想開通,不介意囝囝搞姊弟戀。

Orignal From: 黎耀祥認周麗淇新抱仔

沒有留言:

發佈留言