年年無綫台慶頒獎禮，花旦小生例必鬥到你死我活，今年視帝鬥得最激，繼「Law霸」鄭嘉穎日前拍《怒火街頭2》爬牆甩褲半天吊後，「Laughing Sir」謝天華都唔輸蝕，在無綫電影《LAUGHING GOR之潛罪犯》中搵命博，包攬所有危險動作，全部親身上陣，上周六踢住膠拖喪跑玩逃獄，混亂中趴街倒地，導致腳趾「磨薑」流血不止，之後又忍痛攀上幾層樓高雲梯扮跳海，在沒有安全措施下，半個身飛出支架，睇見都心寒，Laughing Sir果真瞓身賣命，無綫應該識做。
採訪：方騫平、畢紹基
論當旺人氣和拼勁，大熱準視帝謝天華認「第一」，應該無人敢反對，話說無綫食住《潛行狙擊》個勢，再下一城開拍電影《LAUGHING GOR之潛罪犯》，繼續由天華孭飛，為表忠誠，Laughing Sir瞓身賣命，一切危險動作都親身上陣，一句講晒，型！
喪跑唔錫身
上周六，Laughing Sir為新片拍攝重頭逃獄戲，只見踢膠拖、穿監躉服的謝天華神采飛揚，甫到場已跟劉兆銘、金剛、MC JIN、林雪等打牙骹，表現十分風騷。
導演要監躉Laughing拖埋銘Sir喪跑逃獄，Chok到青筋暴現的他因膠拖唔啱Size，狂奔時，不慎被老臨Kick低，搞到右腳腳趾「磨薑」流血，所謂十趾痛歸心，面露痛苦表情的天華即時拐下拐下，嚇得工作人員急急上前慰問，替他噴噴霧膠布消毒止血，唔怕醜的天華，竟公開騷對污糟邋遢腳，然後親自噴多一次噴霧膠布，咁污糟都咁姿整，在旁的林雪忍唔住取笑話：「咪好似油灰水咁，油第二次咪靚晒咯！」
紙皮箱墊底
為免影響拍攝進度，謝天華枴住拖銘Sir拍另一場動作戲，兩人攀上幾層樓高的消防車雲梯頂，天華更半個身伸出支架外扮跳，見他並無扣上安全帶，下面只有七個武師頂住工程架，而身邊得一個武師傍住，面向無敵大海，成個人冇重心支撐住，地下只得幾個紙皮箱做墊底保護，都咪話唔得人驚！謝天華一於拍心口頂硬上，咁樣瞓身博到盡，點都要畀個Like佢。
再次成電影主角，謝天華獲化妝、整頭貼身照顧，雖然天華個Chok樣招招積積，但他冇擺大明星架子，等埋位時，跟同場演員hea吓講吓，鬼咁融洽。問到天華係咪吼實視帝獎座時？他眉飛色舞說：「信心都有嘅，但我唔諗咁多喇，做好崗位先，觀眾應該有目共睹嘅，我同太太都唔想有無謂嘅壓力，老婆仲成日提醒我，叫我唔好將獎項睇得咁重。」
謝天華拍這場逃獄戲時，青筋暴現，十分入戲。
謝天華被吊到幾層樓高拍攝，更沒有縛上安全帶，其間，他要將半身攀出雲梯外，狀甚危險。
天華一個不留神，不慎趴街，搞到右腳腳趾「磨薑」流血（左圖）。
大熱視帝逐個捉
謝天華
「Laughing」已成為謝天華的代名詞，在《潛行狙擊》孭重飛做第一男主角，該劇首播即收30點高收視率，「六嬸」方逸華為了這個角色特別找人設計限量版Laughing手辦公仔，而無綫高層梁家樹生日派對時當眾承諾今年要捧謝天華當視帝。
鄭嘉穎
鄭嘉穎憑劇集《怒火街頭》「Law霸」一角人氣急升，大結局最高勁收35點，無綫亦火速點名他再擔正《怒火街頭2》。
黃宗澤
《潛行狙擊》中「跛Co」角色成為黃宗澤近年的代表作，深入民心。黃宗澤更獲無綫力捧，除有份拍新片《LAUGHING GOR之潛罪犯》外，來年更為兩劇擔正演出，而無綫亦有高層建議，由黃宗澤、胡杏兒情侶姿態奪視帝、視后，令到台慶頒獎禮更爆。
Orignal From: 《LAUGHING GOR之潛罪犯》越獄戲份拍攝
沒有留言:
發佈留言