安慰獎
密室會議分獎 陳展鵬焗棄男飛躍
2011年11月16日
唔夠一個月就到台慶頒獎禮，小生花旦為獎爭餐死最後衝刺。
獎要爭，其實細獎亦爭崩頭，打滾17年嘅陳展鵬，今年憑《真相》中的斯文律師彈起，仲有傳可憑此劇攞「飛躍進步男藝員」，可惜上週四（10日）公布提名名單，陳展鵬竟然落選。表面似失寵，但據知原來高層別有用心，實行用提名最佳男主角出手捧佢上一綫，雖然只係陪跑，但獲無綫肯定男主角地位，好過攞個豬肉獎啦！
係我三生有幸！真實對白
陳展鵬由大熱到冇獎，不過佢就話：「今年我覺得已經賺咗喇，有提名就夠！我有信心㗎，但我好有自知之明！」
34歲陳展鵬捱足17年，今年終憑《真相》擔正，收視口碑唔失禮，加上下年有《ATF反恐》、《回到三國》和《酉陽雜俎》排住隊等上，難怪一直有傳佢攞硬今年「飛躍進步男藝員」。但上週無綫公布提名名單，陳展鵬竟然冇出現喺「飛躍」一欄，反而爆冷獲提名「最佳男主角」。
《廚師》爆笑
《街坊廚神》金剛同小儀一齊主持，觀眾對金剛嘅獨有廣東話相當受落。節目收得，加上係無綫親生仔，攞獎都合理。
金剛攝攞
我信心唔大！真實對白
對於有機攞「飛躍」，金剛話冇乜信心，仲話：「我睇好MC Jin，因為佢真係多嘢做！我唔夠佢鍊呀！」咁謙呀！
《荃加》生鬼
金剛喺《荃》劇中戲分唔多，拍劇亦少，但勝在廣告多，幫無綫搵唔少錢。
捧上主角位
雖然陳展鵬冇份攞「飛躍」，但原來並非壞事。據知情者說：「班高層埋枱傾，第一個傾嘅獎係『最佳男主角』，珍姐（無綫高層曾勵珍）第一個撐就係《真相》陳展鵬。仲話：『咁你去咗一綫，點解要落番去同班二，三綫爭『飛躍』呀？」
陳展鵬一入TVB就同謝天華、鄭嘉穎爭視帝，雖然只屬陪跑，不過有珍姐欽點肯定地位，煎pang週一對本刊說：「我覺得冇『飛躍』都ok喎！能夠提名『男主角』同『我最喜愛』，呢一個肯定對我好緊要，我都撈咗17年，家畀我『飛躍』我一定開心，但有啲尷尬囉！我一定要多謝珍姐，佢畀我拍《真相》係我三生有幸！都唔知點多謝佢！」
陳展鵬冇份提名「飛躍進步男藝員」，變相令有份嘅金剛、林子善、歐陽靖爭獎有曙光，但據知憑《街坊廚神》和《荃加福祿壽探案》叫兩飛的金剛，一向甚得無綫高層喜愛，加上係無綫親生仔，故「男飛躍」一獎幾乎已成金剛囊中物，但上週四（10日）金剛出席頒獎禮記者會時，表示：「沒可能，一定不是我呀！我自己睇好MC Jin，因為佢真係多嘢做呀，我信心真係唔大！」
5高層操生死
據知兩星期前一班高層開會商討頒獎禮「最佳男主角」入圍名單，而珍姐就力撐陳展鵬入選，正式上位一綫，成為未來2、3年的力谷對象。
《真相》出色
陳展鵬今年首度孭飛，即獲好評，雖然有份提名爭視帝同「我最喜愛男角色」，不過多數陪跑。但佢話：「肯定我係男主角，老實講開心過攞『飛躍』！」，但有唔少網友就戥煎pang唔抵。
陳展鵬剛拍完《ATF反恐》，下年會拍《酉陽雜俎》，又有珍姐力撐，一綫主角位，真係好穩，話唔定下年真係視帝熱門㗎！
陳豪認輸
唔使講，今年一定冇我份，一定係謝天華同嘉穎爭，我睇好嘉穎。
胡囧攞硬視后
阿佘離巢，造就無綫一姐位有得爭，由最初胡杏兒、鍾嘉欣、徐子珊、陳法拉，到現在剩番胡囧同法拉，不過胡囧佔盡天時，《萬凰之王》12月4日播大結局，台慶頒獎禮就12月5日舉行，個勢靚到冇人有，加上撈咗12年， 排隊都排到啦！
杏兒喺《萬凰之王》飾演嘅皇后，可惜演技冇乜網民撐。
法拉攞「喜愛」
陳法拉喺《潛行狙擊》結局一幕，備受網民討論，加上套劇收得，絕對夠資格攞「我最喜愛的電視女角色」。
今年視后由胡杏兒、陳法拉之爭，反而另一花旦楊怡，雖然有份一齊爭，但論聲勢就唔及兩位。
踢爆賽果 嘉穎再封帝
「最佳男主角」 鄭嘉穎《怒火街頭》
「我最喜愛的電視男角色」 謝天華《潛行狙擊》
「我最喜愛的電視女角色」 陳法拉《潛行狙擊》
「最佳男配角」 林子善《怒火街頭》
「最佳女配角」 陳敏之《怒火街頭》
「飛躍進步男藝員」 金剛《街坊廚神》
「飛躍進步女藝員」 樂瞳《點解阿Sir係阿Sir》
Orignal From: Face版「萬千星輝頒獎典禮2011」賽果
沒有留言:
發佈留言