入行三年後，其實開始對呢個圈厭倦，覺得冇晒自己生活，好似拍劇咁日夜顛倒，真係應付唔嚟，一直都係做自己唔鍾意做嘅事，但我又唔可以拒絕公司，個人愈來愈迷失！三年一個小回顧，喺娛樂圈三年就等於普通人做咗十年工作，一直都想改變現狀，要點改變呢？真係唔知，可能嫁出去係唯一辦法。
三年前有半年時間都係單身，因為自己一直都有拍拖，真係好唔習慣，要喪學嘢同約朋友出街去填滿自己、豐富自己嘅時間。咁啱認識到Kenny，冇耐就追我，我覺得試吓又無妨，咁我哋就一齊喇！
「箍得佢太緊會窒息」
我知好多人都覺得點解我要閃婚？我就會問佢點解唔得？拍拖兩個幾月，當知道自己有咗BB，Kenny就向我求婚，佢話一直都好想搵一個適合嘅女仔同佢共度一生，係一個Family Man嘅人。奈何之前遇上嘅女仔都唔定性，冇一個適合佢，因為緣分到，感覺到喺對嘅時間遇到對嘅人，我就一口應承。其實就算冇BB，如果Kenny向我求婚，我一樣會答應，Why Not？我一向鍾意年紀大過我嘅男人，至少都要5年，Kenny大我12歲，閱歷豐富，聰明到不得了又有經濟基礎，心地好到不得了，最緊要係錫我，真係冇理由唔嫁畀佢。
有人話Kenny花心，咁又點？最緊要係佢唔好搞搞震！講真，見到靚女我都會望吓，如果我箍得佢太緊就一定會窒息，正常社交係絕對冇問題，我睇得好開。喺老公面前唔係扮蠢，而係佢真係比我聰明好多，有時佢講一大輪長篇大論，真係聽極都聽唔明。喺佢心目中，我係比較稚嫩，係一個好乖嘅老婆。
同Kenny結合一切都係緣分，有冇小朋友結局都係一樣，我哋唔係有一個好溫暖嘅家咩？就算未婚就有小朋友又點？依家係乜嘢年代呀？記得當時我同公司講話要嫁畀Kenny，樂小姐（樂易玲）就話要同佢傾吓電話，了解佢係一個點樣嘅人，得到嘅Feedback都好正面，樂小姐話Kenny嫁得過，畀到我好大信心。
「多謝舊愛令我成長」
我以前係好鍾意拍拖嘅人，到依家都仲有人問我點解唔嫁畀黃生（前男友黃重生），要澄清唔係當時我唔肯生小朋友而分手，而係因為我未夠定，當時我喺事業上仍想搏殺，如果同佢結婚會有衝突，家人亦極之反對我同佢一齊，所以剩番一個辦法，就係分手！好慶幸我拍過4次拖，4次都遇到好男人，毫無疑問黃生係好人，但我覺得Kenny更適合我。我冇後悔同任何人拍拖，因為絲絲點點嘅記憶令我不斷成長，真係好多謝佢哋！（明日待續）
Profile
姓名：徐淑敏（Suki）
三圍：33.5、22.5、33
選美榮譽：2006年香港小姐競選「旅遊大使獎」
參與劇集：《最美麗的第七天》、《野蠻奶奶大戰戈師奶》、《巾幗梟雄》 等
口述：徐淑敏
Suki盛讚老公聰明、心地好，即使當年沒有BB也甘願下嫁。
Suki已是兩女之母，擁有一個幸福家庭。
老公Kenny承諾愛足一世
Suki與Kenny拍拖僅兩個月便決定拉埋天窗，對於Suki這位賢內助，Kenny讚不絕口，並稱娶得這位老婆是三生有幸：「冇錯，第一次見到Suki就有一份親切感，佢笑得好甜，分人又樂觀，最緊要係冇機心。一識佢，我就知要追佢，希望佢可以做我老婆！」
Kenny不介意奉子成婚，只要是真愛，又何須分次序？他說：「依家係乜年代，就算係咁又點，我對Suki好，Suki對我好就得，事實已擺在眼前，我婚姻生活好美滿，我會對佢好，承諾係一世。」
Suki當年奉子嫁黃浩，令人大感意外！
幸福港姐速成少奶
Suki入行短短6年，只用3年時間便火速上岸做少奶奶。
2006年
Suki參選香港小姐，惜大熱倒灶，最終只奪旅遊大使獎。同年主持節目《最緊要正字》，與另一主持王貽興傳緋聞。
2007-2008年
Suki成為無綫力捧新人，主持多個飲食節目，因樣靚身材正被封無綫「咪神」。
2009-2011年
Suki與黃重生分手，2009年8月撻着從事飲食業的黃浩，11月奉子成婚。翌年3月誕下大女Vianna，去年9月再誕下細女Renee，三年抱兩，好生養到暈！
先有後婚 家庭美滿
圈中奉子成婚「個案」屢見不鮮，大多擁有美滿家庭生活，並與事業取得平衡。
陳自瑤 王浩信
陳自瑤（YoYo）與王浩信去年11月結婚，有指因YoYo「有餡」而拉埋天窗，最終她於今年3月誕下女兒，組織一個溫馨小家庭。
謝安琪 張繼聰
謝安琪於2006年宣布未婚懷孕3個月，並即與張繼聰結婚，惹來多方閒言。兩人最終排除萬難修成正果，誕下愛兒張瞻。
何思諺 Tom
樂隊Mr.鼓手Tom （杜志烜）跟「陽光妹」何思諺（Leanne）拍拖僅兩個月便發表聯婚聲明，Leanne更自爆做未婚媽媽，並於今年1月誕下愛兒。
Orignal From: 徐淑敏無悔奉子成婚：依家乜嘢年代
沒有留言:
發佈留言