煒 = 陳煒 江 = 江美儀
江：我同你16歲就識，仲記得嗰時我哋讀珠海書院，你啲頭髮長到腰，之後你選亞姐時剪短咗頭髮，幾乎唔認得你呀！後來見到個女仔成日對住我笑，仲要你提我先醒起，真係女大十八變咯！
江美儀（左）與陳煒年少相識，雖然入行後才「重遇」，不過二人的姊妹情深厚，感覺兩小無猜得很。
江美儀在陳煒面前可做回自己，大晒童真一面。
1997年
江美儀入亞視夥拍鄭則士處女拍劇。
煒：你嗰時就勁啦！記得妳拍咗好多廣告，我覺得你好有talent，好羨慕你可以跟周潤發拍廣告！
2003年
江美儀與陳煒重聚後姊妹情一日千里。
2012年
陳煒過檔無綫，與好姊妹又做同事。
江：我由93年至97年都不停拍廣告，我嗰期有歐陽妙芝、陳豪……嗰時你睇電視講得出嘅廣告都有我份，洗頭水、衞生巾、日用品等等，不過我殺一輪就收山，入咗亞視拍劇，同鄭則士（Ken）合作《肥貓正傳》，一拍就拍咗兩套。
江美儀愛狗，對動物充滿愛心。
兩女在訪問中天南地北都可以講一餐。
煒：啱啱拍劇有冇啲不愉快經歷？
江：當時我冇乜演戲經驗都「好蠢」，一舊雲咁，成日NG，畀Ken哥鬧到抽筋，我嬲到喊，鏡頭後要心理輔導。
煒：嘩！咁慘？
江：跟住Ken哥其實學到好多嘢，令我知道要對角色了解，好似《肥》劇入面我飾演社工，見盡唔少人離世，但我唔了解，演戲時係咁喊，Ken哥就話我知，其實我個社工角色一向見盡慘事，冇理由喊到咁！
煒：係呀！我都同Ken哥合作過，佢鬧我哋即係教我哋啫！
江：之後喺亞視一輪都冇戲拍，人好Down戾氣好重，之後我去咗做電台。
煒：我記得，你都做咗2、3年時間。
江：嗰時你就好幸福，識咗男朋友（即現任老公），而我就喺感情谷底。不過，你都幫我好多！
煒：傻啦，乜你咁客氣o架！
江：嗰時我真係好需要人扶一把，唔使多，你就係做到！多得你畀咗好多「心靈雞湯」我飲，所以呢……我哋呢啲義氣仔女，只要煒哥你開到聲要幫手，我乜都會答應！
過檔無綫再重聚
煒：嘩！你又唔使講到咁嚴重！我過嚟無綫都要你多多指教！
江：無綫呢邊競爭大，演員個個都好專業，個個掛住演好自己嘅戲，唔會有鬆懈。
煒：同意，佢哋冇一場戲會Hea！
江：所以唔係話交唔到心，而係冇時間冇空間，其實我都好掛住亞視班同事包括幕後，依家連你都過埋嚟，我哋又可以一齊打拚！
寵愛有加拉近距離
煒：我哋都有共同嗜好就係養寵物，我喺泰國時執好多貓番屋企養，最初我帶咗隻患有白血病嘅貓返屋企，畀好多好多愛心去照顧佢，最後佢離開之後，我都繼續收養另外四隻，有兩隻仲黑到發光，好得意o架！
江：而我就去到邊都帶住我隻狗仔。
煒：真係有情有義！
江：係呀，無論行街、拍戲、開工我都會帶住佢，因為動物嘅世界入面，主人就係佢嘅全部！我隻狗仔會好乖咁坐喺狗袋裡面，唔會亂嘈，總之佢望到我就心安，而我都會心安！
煒：其實我覺得貓同狗都好識性，佢哋唔單止知邊個對佢好，亦會好似人咁會對主人產生深厚感情。我同老公近期就喺狗隻訓練場收養咗隻大髀關節有問題嘅金毛尋回犬Whisky。
後記
與陳煒的訪談過程很流暢，因為她是一個爽朗、不造作的藝人，然而，一眾嘉賓都對陳煒讚口不絕，指她是一個「義氣仔女」，筆者亦很認同，否則她不會一口答應做這個訪問及主動相約受訪嘉賓，碌盡人情卡。
攝影：劉智源
場地：Baby Cafe（銅鑼灣）
（陳煒）髮型：Matthew Ng@Hair Corner（Central） 服裝：I Posh
（江美儀）髮型：Ivan Lee@Heatquarter Limited 化妝：Ivan Lee
Orignal From: 江美儀低谷遇陳煒爭住報恩
沒有留言:
發佈留言