娛一叮
殼王私下開聲 撐陳法拉做視后
2011年09月02日
自佘詩曼離巢北上發展後，無綫一眾「親生女」如陳法拉、胡杏兒、楊怡、鍾嘉欣，第一時間爭凳仔，希望頂替懸空的一姐寶座。
台慶頒獎禮仲有兩個月，個個發夢都想做視帝、視后，若然得最高領導人鼎力相助，咁就實食冇黐牙。
年初已上場的無綫新主「殼王」陳國強，一直堅稱「不會參與公司運作」。但本刊得悉，兩周前，「殼王」相約無綫副行政主席梁乃鵬，到四季酒店午餐密斟，席間新老闆開口埋口表示「法拉做得幾好」！一聽見梁博士讚胡杏兒後，即說：「我好少睇佢做戲。」殼王講到出口，邊個最有機會做視后？盲嘅都知！
陳法拉雖然年資淺，但近年受無綫力捧，參與多套重頭劇，如今得殼王欽點，有望問鼎今屆視后。得知殼王睇得起，法拉大笑說：「要多謝佢啦！」
阿佘離巢後，目前為止，屬 TVB花旦第二梯隊的陳法拉、楊怡、鍾嘉欣及胡杏兒四位「親生女」，都是視后的頂頭大熱。四女在近期播出的劇集皆有好表現。要揀邊個做視后，絕對有難度。而每年「頒獎禮」前一個月，無綫四大高層陳志雲、樂易玲、曾勵珍及梁家樹都會開會商討獎項花落誰家。每個馬房都有自己心水靚馬，要捧自己友亦無可厚非。不過今年賽果極可能出現變數，事關新老闆「殼王」陳國強私下開到聲，高層當然要諗諗嘞！
胡杏兒今年兩套劇《魚躍》和《怒火》，成功擺脫冏冏慘樣，可惜未被殼王睇好。爭奪視后，睇怕有難度。《壹週刊》圖片
《壹週刊》圖片
殼王：法拉夠壓台
年初「殼王」正式上場後，一直堅稱「未來三年不會參與 TVB日常運作」，好讓「六嬸」方逸華能繼續充當龍頭角色。
不過，離頒獎禮還有兩個月，「殼王」卻頻頻與高層食飯密斟。上月 16日，「殼王」相約六嬸及無綫新聞部高層袁志偉在電視城西餐廳午飯，當時六嬸向記者解釋只是「普通吃飯」。至翌日（ 8月 17日），「殼王」又再出動密會無綫副行政主席梁乃鵬，到四季酒店的龍景軒中菜廳午飯。有當日在該店吃飯的食客向本刊記者透露，兩人食飯時未有坐廂房，反而選擇了有海景的大廳角落位。兩人傾完公事後，閒聊起來，其間傾開視后人選。梁乃鵬問殼王有冇睇《怒火街頭》，還讚胡杏兒做得好，有突破。點知殼王皺一皺眉話：「我好少睇佢啲戲！」殼王講完，梁乃鵬即刻收口，之後殼王仲好大聲話：「如果要俾，我都揀法拉啦，最近睇佢套《潛行狙擊》，佢做得唔錯，幾壓台呀！」
論資歷，法拉當然未夠班攞視后，不過殼王金口一開，法拉爭視后睇高一線。
縱使胡杏兒經常遭網友惡搞，「冏冏」纏身，人氣麻麻，不過無綫副行政主席梁乃鵬，對她卻情有獨鍾，早前在無綫飯局中，更主動與胡握手。《壹週刊》圖片
陳法拉在《潛行狙擊》中，飾演的 Madam Jo外冷內熱，夥拍謝天華雙雙人氣高企，更帶挈《潛》劇收視平均保持 31點，難怪殼王對她情有獨鍾。
一直強調自己不會干預無綫日常運作的殼王，上月中（ 8月 16日）被傳媒拍得與六嬸方逸華、無綫新聞部阿頭袁志偉，在無綫大樓的西餐廳食飯。殼王頻頻有動作，惹起外間揣測。
殼王相約梁乃鵬到四季酒店的龍景軒食飯密斟，二人不避嫌在大廳中，高談闊論心目中的視后人選。《蘋果日報》圖片
欽點杏兒拍劇
至於梁乃鵬鍾愛胡杏兒，其實亦非一朝一夕。早年胡為拍《肥田囍事》，刻意增肥 42磅，但最後錯失視后，看在眼裏的梁乃鵬，私底下曾承諾日後會提攜她。直至去年，無綫拍《魚躍在花見》，有指梁欽點胡杏兒做女主角，至早前的《怒火街頭》，梁乃鵬亦覺得胡杏兒演的「勢利」律師有極大突破，認定她可以再上一層。誰知今次卻遭新老闆潑冷水。
法拉寸杏兒冷門
上周二（ 8月 23日），陳法拉出席《潛行狙擊》宣傳活動。得知殼王出口力捧，法拉即哈哈大笑，說：「邊位殼王呀？（你新老闆陳國強呀！）我唔識佢，通常都係見方小姐。（但殼王欽點你喎！）咁要多謝佢囉！」問到梁乃鵬力撐胡杏兒，法拉即收回笑容，暗寸對方並非熱門：「唔，佢呀……大熱都未必有獎攞啦，仲有幾個月，到時係點無人知。依家一切都係未知之數。」
壓阿佘新劇
視后爭崩頭，不過離巢北上搵人仔的阿佘，雖然已非無綫親生女，早前依然捱義氣抽時間歸隊，夥陳豪拍新劇《 4 in Love》。勢估唔到無綫為捧自己人，竟然打壓阿佘。「兩個月前珍姐（曾勵珍）同樂小姐（樂易玲）成班高層開會，諗緊排邊套做台慶劇。當時珍姐力推阿戚（監製戚其義）套《天與地》，一嚟阿戚係佢嘅人，二嚟套劇都擺咗成兩年，加上卡士勁，擺台慶檔期，收視一定好。點知現場有人就話：『套劇咁多星做，阿佘一個唔該彈出，咪做咗『如妃』（鄧萃雯）翻版，到時唔俾視后佢都唔得啦！」為了減低阿佘爭視后機會，據知《天與地》暫安排在頒獎禮之後，接近新年檔期的三煞位播出。換句話，有份主演《天》、同樣與無綫冇約的林保怡，與阿佘同樣命運，雙雙成為今次頒獎禮的犧牲品。
原本在內地拍劇的佘詩曼，特登抽時間返港為無綫拍新劇《 4 in Love》，誰知在頒獎禮的視后爭奪戰中，慘遭無綫高層打壓。《壹週刊》圖片
視帝、視后之爭
視帝視后身價、地位三級跳，難怪一眾小生花旦吼到實。
不過，無論點爭都好，最終都係睇老細心水。
陳法拉（大熱）
代表作：《潛行狙擊》 最高收視： 33點（暫時）
「對我嚟講壓力好大，我認為自己仲有好大嘅進步空間。」
《潛行狙擊》裏面的 Madam Jo外強內柔加上與 Laughing哥的親熱戲，引死唔少宅男就連老頂殼王對她都另眼相看。大熱人選，非她莫屬。
謝天華（大熱）
代表作：《潛行狙擊》 最高收視： 33點（暫時）
「依家愈多人支持，我嘅信心就愈大每個父母都希望自己仔女考第一。」
早排六嬸同樂易玲 high tea，謝天華係唯一列席的藝員，六嬸更搵人設計 Laughing手辦公仔。六嬸幫到出面， Laughing哥贏硬。
胡杏兒（次熱）
代表作：《怒火街頭》 最高收視： 35點
「攞獎呢啲睇得好化，但我承認做視后係每個女演員嘅夢想。」
新老闆落晒閘，胡杏兒想唔化都唔得好彩都有高層梁乃鵬撐，仍有機彈出。
林峯（次熱）
代表作：《花花世界花家姐》 最高收視： 31點
「拍劇都係做好本份，唔係要爭視帝。不過我幾時都對自己有信心。」
有樂小姐力捧，加上重頭劇《回到三國》有機會排在台慶檔期播出，林峯有望問鼎視帝，可惜霜霜、芳芳相繼殺出，拖累人氣。
鍾嘉欣（黑馬）
代表作：《點解阿 Sir係阿 Sir》 最高收視： 38點
「都有信心，但套劇有好口碑已經當贏咗！」
淚眼 Miss Koo結局中那場淒厲喊戲實在惹人憐憫亦贏得一眾師奶觀眾叫好，有機叫糊。
鄭嘉穎（黑馬）
代表作：《怒火街頭》 最高收視： 35點
「以前都攞過啦，依家唔諗，劇集口碑勝過一切。」
出動靚股「 Law霸」的鄭嘉穎，雖然套劇叫好叫座，但鄭由於攞過視帝，分豬肉肯定會蝕章，難怪鄭視帝信心一般！
楊怡（半黑）
代表作：《真相》 最高收視： 35點
「我對自己有信心但邊個得獎都係閉門一家親。」
即使閉門一家親，但真相係咪真係一家人咁和諧？
今年冇乜代表作的楊怡，明知陪跑機會大，自我安慰吓都好正路。
陳豪（半黑）
代表作：《點解阿 Sir係阿 Sir》 最高收視： 38點
「都係做好自己嘢，我不嬲唔計較呢啲！」
《點解阿 Sir係阿 Sir》中，陳豪表現未算突破不過《點》劇暫時是全年最高收視劇集，就算陳豪搶唔到視帝都有機攞個最佳劇集獎嘅！
佘詩曼（陪跑）
代表作：《花花世界花家姐》 最高收視： 31點
「我就真係未必喇，到時未必出席。不過睇好鍾嘉欣。」
阿佘離巢，攞獎機會率幾乎係零難得阿佘大方撐對手，絕對係輸獎唔輸陣。
黎耀祥（陪跑）
代表作：《法證先鋒 3》（十月播出）
「我睇好 Bosco（黃宗澤），佢隨時彈出。」
連續攞兩屆視帝的黎耀祥，雖然有套《法證》排在頒獎禮前的有利檔期，但黎視帝要三連霸，睇怕機會甚微。
Orignal From: 殼王私下開聲 撐陳法拉做視后
沒有留言:
發佈留言