求其撈飯
打仗一隻馬都冇 豆泥《三國》賣笑遮醜
2012年07月11日
大陸劇《三國》在高清翡翠台播到尾聲，諸葛亮晚晚惡鬥司馬懿，追少晚都 瞓唔着。
三國題材長做長有， TVB當然唔執輸，有樣學樣拍番套《回到三國》，搵林峯馬國明同楊怡孭飛，今週播映擺明當秘密武器硬撼奧運。有chok峯坐鎮照計好穩陣，不過《回》劇拍攝時，撞正監製劉家豪辭職同臨時演員大罷工，算死草無綫唔肯 揼本大搞，全劇留港取景之餘，連真馬都唔捨得租一隻！
打仗打到咁慳皮，難怪連林峯都恥笑，「你當笑片睇得 㗎喇！」史劇變咗笑片。
強國《三國》堅
《三國》求其一個場面都有大堆馬撐場，反而《回》安排十幾個士兵就當出戰，堂堂關羽同諸葛亮都要做步兵，拎住把咁重嘅關刀，行到去都冇力打啦！
去年 3月拍《回到三國》時，撞正潘霜霜床照連環爆，男主角林峯日日俾記者追訪，心情大受影響。黑開有條路， 5月又遇着臨記因最低工資問題大罷工，《回》劇監製劉家豪又同老婆梅小青一齊遞信過檔 now，一波三折，卒之大製作變笑料慳水劇。
撞正臨記罷工， TVB當時講到明要減拍大場面，呢類混戰情節人少唔在講，更要拉班助導落場。
劉家豪同一時間有《護花危情》同《回到三國》兩套劇出街，表面好似好威，實則無綫拎佢最後兩套作品撼奧運，擺明當炮灰。
導演扮士兵
由於《回》劇講馬明由現代穿越返回三國時代，據知劉家豪原本打算學《大太監》同《金枝慾孽 2》，拉大隊上橫店取景，可惜當時高層已知道劉將會過檔，決定縮皮唔批製作費。
限米煮限飯，劉家豪惟有留港，轉到石礦場、南生圍同古裝街取景，慳得就慳；唔夠臨記用，又臨時拉夫叫助導同導演落場扮士兵，一人幾角，或者用電腦後期加工，兒戲交貨；另外係人都知《三國》劇 sell打仗， TVB竟然連馬都唔租一隻扮打仗，簡陋得離譜。
我哋冇千軍萬馬！（真實對白）
你當笑片睇得㗎喇！（真實對白）
「冇千軍萬馬㗎！」
未出街先被插，上週為新劇宣傳的林峯同馬明都知道紙包唔住火，一聽到記者話成套劇一隻馬都冇，馬明已率先搶答，「係呀，我 哋冇千軍萬馬 㗎！」而林峯則負責努力迴避問題，叫記者唔使太認真。
F：《 FACE》 林：林峯
F：怕唔怕將《回到三國》同大陸嗰套比？
林：千祈唔好，我 哋係搞笑輕鬆 嘅！
F：好似話原本唔係想搞笑喎？
林：呢 啲我都唔知，你問番監製啦！
F：係咪搵助導同導演幫手做埋士兵？
林：咁佢 哋都好落力為套劇……係啦，我都答你唔到，你當笑片睇得 㗎喇！
F： TVB搵《回》劇打奧運，驚唔驚變炮灰？
林：收視我控制唔到，其實睇完《三國》先睇奧運咪得囉！
F： TVB冇得播奧運 㗎！
林：吓，冇得播咩？哦……拜拜！
馬明裸浴
《大唐雙龍傳》有吳卓羲同林峯孖住露股，今次就有馬明穿肉色褲扮全裸浸溫泉。單睇劇照，馬明似乎搶過 chok峯多多聲喎！
穿越鋤弟
打馬吊就話係中國國粹啫，馬明喺劇中玩啤牌鋤大弟，騎呢咗啲囉！
低 B恐龍
其中一幕講馬明用時光隧道誤返侏羅紀時代，雖則套劇以搞笑為主，但隻恐龍仲假過《反斗奇兵》嗰隻，笑死人咩！
馬明用盡現代女手法將侍婢楊怡追到手，但楊枱唔肯跟馬明去現代，變咗阿伯嘅馬明惟有返三國搵佢。
李家鼎：無綫孤寒有乜辦法？
租馬一啲都唔貴！（真實對白）
拍過無數劇集的鼎爺，現時身兼騎術教練，曾教江若琳等女星騎馬（圖），鼎爺話租馬拍戲根本唔難亦唔貴，「我以前幫人搞就 5千蚊一隻，逐日計，每日 8個鐘，一 啲都唔貴！不過無 綫孤寒有咩辦法？唔肯出錢咪冇馬囉！」
索腿小喬玩幾集
周瑜老婆小喬喺原著非常重要，林志玲亦曾經喺《赤壁》扮過，今次劉家豪搵咗陳敏之做小喬（右圖），但奇怪在百幾張官方劇照中，竟然全部冇敏之，連官網人物介紹亦冇呢個角色！原來敏之只係客串，喺劇集後段出現：「可能個網改唔切啩，原本冇呢個角色，後尾家豪哥覺得要有小喬，先搵我幫手，雖然戲分唔多，但可以扮大美人冇所謂啦！」
Orignal From: 打仗一隻馬都冇 《回到三國》賣笑遮醜
沒有留言:
發佈留言